Lebih agi bekaul enggau timpuh nyerahka rumah nya ngagai pemeli dikena nyeliahka sebarang penanggul
KUCHING: Pemaju pengawa berumah di menua tu dilalau nitihka atur ti udah disemayaka dalam Sempekat Jual Beli (SNP) enggau pemeli rumah.
Sapit Chairman Tribunal Tuntutan Pembeli Rumah Sarawak (TTPRS), Peter Lim Thian Seng madahka lebih agi bekaul enggau timpuh nyerahka rumah nya ngagai pemeli dikena nyeliahka sebarang penanggul.
“Aku minta sereta ngarapka pemaju patut nitih tauka bebasaka atur ti udah disemayaka dalam SNP.
“Taja pan SNP nya semina semaya entara pemaju enggau pemeli, tang sida (pemaju) patut nitihka Ordinan Pemaju Perumahan ( Kawalan & Pelesenan).
“Kitai berasai irau ati laban pemeli semina nyain surat tang enda beratika penerang ti ditulis dalam SNP iya nya baka ‘aku setuju nadai tauka bisi peminta lebih’. Tang anang enda ingat pemaju mega patut nitihka Ordianan Pemaju Perumahan (Kawalan & Pelesenan),” ku iy dalam aum pengarang berita ditu kemari.
Dulu ari nya, Peter ti disempulangka Kaban Panel Alhadi Ibrahim enggau Robert Elone Sireng mendingka kes entara penawa tauka pemeli rumah Nixson Lumpoi enggau pengari Pemaju Pengawa Berumah Jung Kuo Sdn Bhd ba TTPRS ditu, pagi kemari.
Lebuh dipinta ngenang kes nya kemari, Peter madahka kut minta kededua piak iya nya penawa enggau pemaju berandau sereta berunding ngiga pemutus dulu, sebedau kut ngaga pemutus.
Ku iya, penawa minta pampas ari pemaju berindik ari ti laun nyerahka rumah nya nitihka timpuh ke patut.
Iya madahka kut sebedau ngaga pemutus endang minta sereta meransang kedudua piak berandau di luar kut lalu ngaga pemutus ti lebih engkeman.
“Penawa minta pemaju mayar pampas ketegal (pemaju) ti laun nyerahka rumah iya nya ngelui ari ke udah ditetapka.
“Baka ti udah disebut dalam kut tadi, kami meransang sereta ngemeratka kededua piak berunding di luar kut ngambika lebih meretika pangan diri sebedau ngaga pemutus.
“Asil ari pemutus randau di luar kut tadi, pemaju deka mayar RM700 ngagai penawa lalu penawa pan udah setuju, ari nya kut udah ngemendarka penyampau bayar pampas nya,” ku iya.
Kelimpah ari nya, lebuh ditanya bekaul enggau kes ti diputarka TTPRS dalam taun 2014, iya madahka bisi 16 iti kes bisi nyadi di serata nengeri Sarawak.
Ari penyampau nya (16 kes), bisi empat (4) kes diputarka kededua penawa enggau pemaju ari luar kut di Kuching enggau Miri, lima (5) kes matak diri (Kuching, Miri, Sarikei), sereta tujuh (7) kes dipendingka ba TTPRS Kuching, Sibu, Miri enggau Mukah.