SIBU: Tabung Belia Dayak Pertubuhan Belia Dayak Sarawak (PEBEDAS) udah dipenyadi nyerumba Pengerami Makai Lemai Ngumpul Belanja PEBEDAS ditu, malam ensanus.
Wang turu nya dipenyadi Ketuai Sekretari Politik Kepala Menteri Abdullah Saidol.
Kenu ku Presiden PEBEDAS Daniel Batin, wang turung tu deka dikena mantu raban nembiak Dayak ba pekara pelajar enggau pekara bukai ke bekaul.
“Tuju kami numbuhka wang turu tu ngambika bisi dikena mantu nembiak Dayak ba mayuh bidang nyengkaum pekara ke bekaul.
“Wang turu tu ukai semina ungkup PEBEDAS aja tang mega ungkup bala nembiak Dayak di nengeri tu,” ku iya madah rambau pengerami nya.
Sama bisi datai Kaban Kunsil Nengeri (ADUN) Ngemah Alexander Vincent, empat iku Sekretari Politik Kepala Menteri iya nya Romeo Christopher Tegong, Andrew Shilling Banggit, Wilson Nyabong Ijang enggau Jefferson Jamit Unyat, Pemesai Pelilih Kanowit Katis Noel Nyabong, Penyanding Penemu PEBEDAS Sibu Alexander Kadir Dato enggau Chairman PEBEDAS Sibu Mathrew Moilan.
Nangkan nya, Abdullah bisi madahka diri besemaya deka mantu bejalaika wang turu nembiak nya.
“Aku deka mantu kita ngulihka bantu wang ari bala pengari rayat ke bebansa Dayak,” ku iya ti mega nyadi ADUN Semop.
Berebak enggau nya, iya muji penemu PEBEDAS ke udah mujur numbuhka wang turu nya laban dipeda ulih meri penguntung ngagai semua nembiak Dayak.
“Pengawa PEBEDAS tu chukup manah laban ke udah mujur numbuhka gerempung tu taja pan agi baru. Ngarapka wang turu tu ulih dikena enggau manah,” ku iya.
Udah nya, iya mega ngelaluka PEBEDAS begulai enggau Saberkas nengeri dalam bejalaika program ke besangkut paut.
“Aku ngangauka PEBEDAS awakka begulai enggau Saberkas nengeri dikena meri peneleba ngagai semua kita. Kebuah pia laban mayuh program ke tau meri penguntung enti kitai besaup ngemujurka iya,” ku tandu iya.
Abdullah mega ngelalau PEBEDAS terus mega tanggungpengawa ke besai ungkup bala nembiak Dayak di nengeri tu sereta ngiga kaban memayuh.
Ba pengujung jaku iya, Abdullah bisi nyuaka pemeri RM5,000 ungkup PEBEDAS.