BINTANGOR: Urung 1,000 iku mensia mayuh deka datai ngulu Program Aram Begulai ke deka diatur PBB N.40 Meradong di Sungai Sian, ditu.
Pengulu Augustine Pau madah, karnival rayat ke dijangka deka diatur pengudah pengerami Hari Krismas nya deka disempulangka enggau mayuh bengkah aktiviti nyengkaum pengerami lumba enggau main.
“Kelimpah ari nyendiaka awak ekonomi ngagai raban pedaja mit, program tu mega diatur dikena ngarapitka kaul entara raban pemesai enggau rayat di nengeri tu sereta diintu beserimbai enggau Hari Krismas ke deka disambut semua pengarap Keristin,’’ ku iya.
Iya mansutka jaku nya pengudah ngulu aum enggau Exco PBB Meradong, Tuai Raban Bansa sereta Pengari Opis Pelilih Menua ditu, kemari.
Ku iya, program ti keterubah diatur taun tu bulih sukung ti positif ari peranak Sungai Sian ke ngembuan 15 buah rumah panjai.
“Pengerami ke sekali tu diadang lebih rami laban mayuh aktiviti deka diatur nyengkaum pekit main futsal, pekit belanda marathon sereta pekit karaoke lalu disempulangka enggau panggau pemerindang sereta cabutan tiket benasit,” ku iya.
Aum ke diatur semak tiga jam nya betuaika Ketuai Sekretari Politik Kepala Menteri, Abdullah Haji Saidol.
Kelimpah ari karnival, mayuh agenda bukai bisi dipejuraika sepemanjai aum nya. Entara agenda ke bisi disebut iya nya, perambu ngatur seminar dikena nyikap pengawa bepilih ti deka datai sereta pengawa ngerijista nama pengundi baru sereta peminta beberapa bengkah projek baru.
Dalam aum nya, Abdullah ke mega Kaban Kunsil Nengeri (ADUN) Semop minta Skuad Sayang PBB terus bejalaika sidi dikena nentuka sebarang isu kelebih isu ke mungkur raban orang indu enggau anak mit.
“Ba awak ke sama, PBB N.40 Meradong mega deka ngatur program ngintu Taun Baru di Kampung Melayu,” ku iya.