SIBU: Opis Pengerara Api enggau Penyah Penusah (Bomba) Sarawak ngungkupka kira RM369,368 dikena ngemanahka pala paip bomba ba serata nengeri taun tu.
Direktor iya, Nor Hisham Mohammad madah, taun seiti ke udah opis sida bisi ngungkupka kira RM279,394 enggau RM448,386 ba taun 2012.
Iya madah, tebal agi pengerusak nya berindik ari ulah jai.
Bisi 33,512 iti pala paip bomba di serata nengeri tu.
Tang taun tu, penyampau pengerusak pala paip bomba nya dirikodka kurang mimit.
Tu asil ari atur pengawa ke digaga opis tu dikena nentuka pala paip nya mengkang uli h dikena sebarang maya.
“Bisi 2,000 iri rusak ‘chamber cover’ enggau 570 pala paip diripotka lenyau beungkus urung RM50,000 kena ngemanhka iya.
“ Pala paip bomba nya agi ulih kena taja udah lenyau ‘chamber cover’ tang kitai tetap ngumbai iya rusak,” ku iya.
Iya madah munyi nya lebuh dipinta meri penemu bekaul enggau penyampau agih belanja dikena ngemanahka pala paip bomba ke rusak.
Berebak enggau nya, opis bomba mega bisi nganjung surat ngagai opis bekuasa pelilih menua di serata nengeri nulung sida meri jaku tangkan ngagai tauke besi buruk awakka anang nerima sebarang besi ari pala paip bomba ke bisi dijual ngagai sida.
Iya madah, penyampau semua pala paip bomba ke bisi rusak ungkup taun tu 6,129 iti, dibanding enggau taun seiti nyin kemari 9,165 iti enggau 5,522 ba taun 2012.
Taja baka nya pengawa ngemanahka pala paip tu deka dikemeratka agi ungkup pala paip ke udah kelalu rusak.