Rayat patut nyukung sereta meri terima kasih ngagai BN laban ke udah mujur meri mayuh pemansang ngagai sida
LUBOK ANTU: Kaban Parlimen Lubok Antu, Datuk William Nyalau Badak berasai ensiban enggau ulah sekeda rayat ke nguji ngelaban perintah Barisan Nasional (BN) taja pan projek pemansang udah digaga ba kandang menua sida.
Kenu ku iya, enti nitih rayat patut nyukung sereta meri terima kasih ngagai BN laban ke udah mujur meri mayuh pemansang ngagai sida.
Nyalau madah, bisi sekeda rayat di sitak mengeri suah ngelaban BN taja pan BN udah bebendar ngemansangka menua sida.
“Aku minta raban sida tu nikal pulai nyukung BN. Aram meh kitai bela mantu perintah BN ngemansangka menua pesisir,” ku iya.
Nyalau madah munyi nya rambau bejadi Program Mantu Rayat (MEMBARA) Patriotisme diatur Opis Pekara Khas Sri Amann di Rumah Nyambong, Serembai, Lubok Antu, ditu, empai lama ke udah.
Nangkan nya, Nyalau mega bisi ngelalau rayat ke nguan menua pesisir meseti bagas ngemansangka tanah puang nengah projek betanam betupi bedandang besai.
“Tanah kelalu berega, Anang ngelakka iya pia aja laban enti dikemansang asil nya tau meri penguntung ke mayuh ngagai diri sebilik.
“Tambah mega, tu endang sebagi ari chara dikena nulung rayat ngemajuka diri sereta nadai ngarapka bantu ari perintah,” ku iya.
Ba pengerami nya mega, Nyalau bisi madahka diri deka meri agih belanja RM5,000 ungkup Komiti Pemansang enggau Pengelikun Genturung Pendiau (JKKK) Rumah Nyambong lalu RM3,000 ungkup gerempung indu sida.
Sama bisi datai maya tu Sekretari Politik Kepala Menteri Sarawak Majang Renggi, Pemesai Opis Pemadah JASA Parlimen P.202 Sri Aman, Whelton Lumpoi, Pemesai Pemadah Parlimen JASA P.203 Lubok Antu Geoffery Baja anak Ricky Maba enggau bala tuai raban bansa ba kandang menua nya.