BAU: Pengundi di sitak N.2 Tasik Biru dilalau anang ngalih nyukung orang baru ngambika pemansang ke diasai diatu majak datai.
Kaban Kunsil Nengeri (Adun) Tasik Biru, Datuk Peter Nansian Ngusie netapka pemansang bedau tentu ulih diberi baka ke dipeda diatu enti pengari rayat ditukar.
“Ketuai patut ngembuan tiga bengkah ulah iya nya bagas gawa, nemu ngereja pengawa enggau ulih ngereja pengawa.
“Kita ke nyadi rayat patut nemu milih pengari lalu anang ketegal penyilap nya ila, kitai enda ngasaika pemansang ti udah diperambu,”ku iya.
Nansian mansutka jaku nya ba pengerami bejadi ‘Prasarana Taman Warisan Semulajadi Stass’ disempulang enggau pengawa nyuaka setipikit Mentor-Mentee Desa Lestari, KKLW di Dewan Genturung Pendiau Stass ditu, kemari.
Dulu agi ari nya, Nansian ke mega Menteri Muda Pemansang Komuniti sereta Menteri Muda (Pemansang Industri) meri puji ngagai pemanah pengawa ti udah dikereja komuniti Genturung Pendiau Stass ke udah dipilih nyadi Mentor ungkup lima Mentee nengah program Desa Lestari, Opis Menteri Pemansang Menua Pesisir enggau Kandang Menua (KKLW).
Lima buah genturung pendiau ti nyadi Mentee Genturung Pendiau Stass iya nya Genturung Pendiau Suba Buan, Apar (Bau), Benuk (Padawan), Kanga (Lundu) enggau Pichin (Serian).
Meretika pinta enggau peneka rayat, Nansian ba pengerami nya ngenukuka dia tiang pemanchar Telekom deka didiri ba genturung pendiau nya taun baru tu ila.
Nansian mega madah deka ngulihka belanja dikena nembuka pengawa ngaga siling gerija Genturung Pendiau Stass kelimpah rizab RM100,000 ungkup pengawa nyendiaka infrastruktur.
Bela datai Ketuai Genturung Pendiau Stass, Jaoi Edward enggau orang bukai.