KOTA SAMARAHAN: Universiti Institut Teknologi Mara (UiTM) Kampus Sarawak deka ngatur pekit ‘Pesta Tari IPT Borneo’ belabuh 12-14Disember tu ila di Dewan Jubli UiTM ditu.
Rektor UiTM Sarawak Prof Dato Dr Jamil Hamali madah, universiti nya nesau semua Palan Pelajar Tinggi (IPT) di Pulau Borneo sama enggau pekit ajat tu.
“Seiti ari pemanah ngatur aktiviti baka tu, ngambika nembiak universiti, lecture, pengereja pengawa universiti ulih bbekunsi penemu sereta beratika tikas pemujur entara sida iya, kelimpah ari pemansang bukai,” ku Jamil.
Iya madah munyi nya ba aum media pengudah Konvokesyen ke-81 UiTM Sarawak Sidang 1 di Dewan Jubli ke digulu ulih Pro-Chanselor UiTM Tan Sri Nuraizah Abdul Hamid enggau Sapit Rektor Pekara bekait enggau Nembiak Universiti (HEP) Prof Madya Wan Akil Tuanku Abdullah.
Pekit ajat ti dipungkal UiTM Sarawak kenyau ari taun 2006, ke endang digaga ungkup ke semua IPT di Pulau Borneo (Sabah, Sarawak, Brunei enggau Kalimantan) disambut dua taun sekali, lalu taun tu, taun ke-5 iya diatur, tang universiti bukai mega diberi peluang ngatur pekit tu.
Taun sebedau tu, iya diatur di UiTM Sabah (2012) nyengkaum kala diatur di Pontianak, Indonesia.
Jamil nandu baru, urung 16 universiti ari serata pulau Borneo ke udah madah deka nyereta pekit tu (dalam 236 nembiak universiti) nyengkaum bala penyukung sida iya.
“Kami bisi nyendiaka perais ke manah, ungkup sida ke ajat, ajat ke pengabis manah, koreografer ke pengabis manah nyengkaum ngepan ti deka dikena sida iya pan bisi perais.
“Pekit tu sigi dikena meransang bala nembiak ngelala adat pesaka diri empu,” ku iya.
Penyampau perais disedia ungkup champian (RM5,000), lumur dua (RM3,000), lumur tiga (RM2,000), ngepan pengabis manah (RM2,000) sereta koregrafer ke pengabis nyulut (RM1,000), lalu tiap pemenang mega deka diberi trofi.
Bala mayuh ke deka nemu silik agi pasal pekit ajat tu, tau betelefon nuju Opis Korporat UiTM Kampus Sarawak, 082-677218.