KUCHING: Opis Pemansang Orang Indu (JPW) dibaruh Opis Menteri Pemansang Orang Indu, Ruang Bilik enggau Raban Bansa sekali agi betemu sereta meri pengelandik ngagai peranak rumah panjai di kandang Parlimen Saratok nengah Program Incubator Kemahiran Ibu Tunggal (i-kit).
Tuju program i-kit dikena nyikap orang indu rumah panjai pasal pengelandik enggau penemu ke tau dikena bejalaika projek dagang sereta servis awakka ulih nambahka penatai pemisi.
Kenu ku pengari JPW Rosmawati Bolhassan, juluk program i-kit dikena mantu sereta meri penerang ngagai orang indu lebih agi indai tunggal ba rumah panjai pasal chara bejalaika dagang sereta ngemansangka mayuh macham pengelandik nyengkaum bidang berapi enggau ngaga ruti.
Nambahka nya, ku Rosmawati JPW udah ngelangkar tiga chara dikena ngemansangka ekonomi, kapasiti enggau kualiti pengidup orang indu.
“Program i-kit ke sekali tu diatur pengelama dua hari berengkah 10 nyentuk 11 November ba Rumah Panjai Engkin Kedoh di Roban, Saratok ti mekuh ngagai pengelandik ngaga Kek Moden enggau Muffin ke selalau dikerinduka orang mayuh kemaya hari tu sekalika maya bisi pengerami tauka diempa diri sebilik.
“Bisi 30 iku pesereta ari tiga buah rumah panjai iya nya Rumah Rantau Sukat, Rumah Joseph Buscha Nanga Kedoh sereta pengari ari Rumah Engkin Kedoh empu, lalu semua sida diajar Chef Razlin Muhammad,” ku iya nengah penerang berita ditu, ensana.
Berebak enggau nya Rosmawati madah dalam dalam program nya diberi tambah pengelandik iya nya chara pun ngaga ruti enggau krim.
Kelimpah ari nya, pengari pesereta Dius Kusam madahka program nya endang dianti raban indu lebih agi sida di rumah panjai.
“Program tu meri pemanah ngagai pesereta laban kami ulih belajarka chara ti betul ngaga kek enggau ruti.
“Kami ngarapka program ti baka tu ulih terus dipejalaika jemah ila sereta ngajar lebih mayuh agi pengelandik bukai,” ku iya.