KOTA SAMARAHAN: Perintah Nengeri enggau Perintah Besai benung berundingka chara baka ni deka numbuhka ‘Hospital Pengajar’ di Universiti Malaysia Sarawak (UNIMAS).
Mandal Chanselor UNIMAS Prof Dato Dr Mohamad Kadim Suaidi madah, sigi udah juluk UNIMAS ngembuan seiti ‘Hospital Pengajar’ dikena nempa mayuh agi peranak nengeri tu nyadi lutur.
Ku iya, Unimas bisi Fakulti Perubatan dan Kesihatan ti ditumbuh kenyau 20 taun ke udah tang diatu mengkang bedau ngembuan ‘Hospital Pengajar’.
“Kitai sigi keran ngembuan ‘Hospital Pengajar’ ngambika pengawa nempa nembiak ditu enda kurang lalu nya nyengkaum pengawa pansik enggau pemansang ba pekara berubat.
“Perintah Nengeri enggau Perintah Besai keran numbuhka sepital nya lalu benung berundingka chara ke engkeman dikena nentuka juluk nya dikemujur,”ku iya.
Iya mansutka jaku nya maya dirandau pemberita pengudah tembu pengawa nyain Sempekat Pemereti Ati (MoU) UNIMAS enggau Palan Berubat Borneo (BMC) di Begunan Universiti, Unimas ditu kemari.
Ngenang senentang pengawa puang ba bengkah pengawa berubat enggau pengurang tubuh orang ke landik, Kadim madah pengawa puang nya enda diisi ketegal nadai mayuh orang ke landik ba pengawa ke dipinta.
“Kitai ukai nadai pengawa puang ungkup pengawa lutur tang iya ke amat kitai nadai chalun ke ngembuan pengelandik.
“Baka ba UNIMAS, bisi 50 iti pengawa puang ke bedau diisi lalu nya nyadi ketegal nadai orang ke landik ke tau nangkup pengawa nya,”ku iya.
Ketegal nya mega, iya ngasai tu meh maya UNIMAS patut bisi ‘Hospital Pengajar’ ngambika ulih nangkup pinta di nengeri tu.
Ngenang senentang MoU nya, Kadim madah kerejasama nya meri awak ngagai raban UNIMAS ngulihka latih praktikal ba BMC.
Ba atur nyain MoU nya, UNIMAS diarika Kadim lalu BMC diarika Direktor Pengawa Berubat BMC Dr John Chew Chee Ming sereta Direktor Atur Kereja BMC Dr Peter Tang Ing Bing.