BARIO: Lima iku nembiak Penan enggau Kelabit ari SMK Bario nerima bantu pelajar ari Yayasan KTS ba sebengkah pengerami ke diatur di sekula nya apin lama ke udah.
Empatiku nembiak bansa Penan iya nya Stillwell Fam, Mike Bala Raman enggau Seljana Abew ari Long Beruang sereta Malcolm Robert ari Long Lamei.
Berebak enggau nya, nembiak bansa Kelabit ke dipilih nerima bantu nya, iya nya Monica Ubar Stephen ari Pa Lungan Bario.
Duit bantu pelajar RM300 seiku nya udah disuaka Menijar See Hua Marketing Miri, Wong Kee Mee.
Bela bisi maya pengerami nya, Prinsipal sekula Yew Kok Wing, Ketuai Serakup Apai Indai enggau Pengajar, Mustapha Raja Sewa enggau ex-Prinsipal, Marlan Carl Maran.
Ku Wong, bantu pelajar ke diberi Yayasan KTS dikemataka KTS Mutual Sdn Bhd.
“ Komiti scholarship KTS nengah kerrjasama See Hua Marketing Sdn Bhd muka peluang nya ngagai 75 buah sekula sekondari di Sarawak ngambika nganjung nama chalun sida.
“Penerima nya ari bala nembiak ke nyulut ke mega datai ari ruang bilik ke bepenatai pemisi ke mit,” ku iya.
Ari 364 iti peminta, 302 iku nembiak ari 74 buah sekula nyengkaum 26 iku ari Miri dipilih nerima bantu pelajar nya.
Ku Wong baru, batang tuju bantu pelajar nya diberi dikena ngelempungka tating belanja apai indai kelimpah ari ngelakuka pengerindu macha bup ba bala nembiak.
Bantu pelajar KTS dipunka dalam taun 2009 dikena mantu ke datai ari ruang bilik ke kurang penatai pemisi di Sarawak tang nyulut ba peresa sekula.