KUCHING: Sapit Menteri Dalam Menua Dato Sri Wan Junaidi Taunku Jaafar ngarapka Perintah Besai ulih nunda Perintah Sarawak ti minta menteri kabinet nyain danji integriti.
Ku iya Kepala Menteri Datuk Patinggi Tan Sri Adenan Satem udah madahka pengawa nyain danji deka dipejalaika pengudah semua opis perintah, badan bekanun enggau kompeni peribit tembu bejalaika semaya integriti sida.
Nya beguna amat dikena nentuka genap iku orang ti megai tanggungpengawa ba opis perintah nadai bechiping lebuh bejalaika tanggungpengawa diri.
“Aku endang ari suba lebuh dalam Kelab Penyokong Barisan Nasional (BNBCC) endang setuju ngambika genap iku orang ti megai tanggungpengawa dalam opis menteri tauka megai portfolio mentaika reta tengkira enggau pengeraja.
“Ari nya perintah ulih meda reta tengkira maya masuk enggau baru ari opis menteri. Enti reta tengkira ke dikembuan nya ngenyit (nambah) reti iya bisi utai enda betul,” ku iya.
Iya mansutka penerang nya lebuh ti ngenang pasal penerang Adenan pasal menteri kabinet negeri deka nyain danji integriti pengudah semua opis perintah, badan bekanun enggau kompeni peribit tembu ngamatka semaya integriti sida.
Wan Junaidi ti nyukung penerang Adenan madahka Sarawak udah ngerandang jalai ngambika orang ti megai pengawa dalam opis perintah nadai bechiping maya bejalaika pengawa diri.
Ngenang pasal pengawa ngaga gerija di Bandar Baru Semariang iya ti mega Kaban Parlimen Santubong madahka, agih belanja baru dikena ngaga gerija nya bisi dipinta baru laban agih belanja ke suba semina chukup dikena ngaga langkar aja.
“Peminta agih belanja baru nya dikena ngaduka pagar, platform, palan duduk sereta sengkar tisi lalu ungkus ti diguna urung RM317,000.
“Aku ngarapka ungkus belanja baru nya ulih diberi enda lama agi, gerija tu diadang ulih tembu tengan taun baru,” ku iya.
Kelimpah ari gerija nya, bisi dua buah agi gerija ti udah dikemendarka digaga dalam taun tu iya nya di Sileng, Lundu enggau Pueh, Sematan.