MIRI: Dijangka 1,000 tauka lebih, bala kaban enggau penyukung Parti Rakyat Bersatu (UPP) di bagi menua Miri deka ngulu aum besai keterubah parti nya kena 23 November tu.
Parti tu udah bulih pemendar ari Opis Pengerijista Gerempung (ROS) kena 14 Julai tu tadi.
Aum besai tu ila diatur alai milih baka ketuai parti bepalan ba Eastwood Valley Golf and Country Club, bepun pukul 11 pagi.
Kenu ku chairman protem UPP Piasau, Datuk Hii King Chiong, ukai semina kaban ke udah ngerijista diri aja ulih datai tang mega mensia mayuh ke bukai ke bisi ati deka nyadi kaban parti UPP.
Lebuh bejaku ngagai pemberita maya aum pengarang berita ditu, Hii madah AGM nya ila deka ngayanka empat pampang iya nya Piasau, Pujut, Senadin enggau Bekenu baum seretai endur milih ketuai komiti parti nya.
Iya madah, maya nya mega bala ke bisi datai deka milih delegit ke dianjung ngulu Aum Besai Tiga Taun Sekali (TDC) ti mega deka diatur keterubah iya.
Sama bisi datai maya aum pengarang berita ke diatur ba opis UPP Miri tu iya nya Chairman Protem Senadin Keith Chin, Bruce Chai (Pujut), Kapitan Haw Min Wai (Bekenu) enggau Sekretari Politik Kepala Menteri Suzanne Lee.
“Kelimpah ari nya, agenda aum nya ila nyengkaum teks chairman protem pampang diri empu sereta chariman komiti besai kelimpah alai milih komiti pampang keterubah iya,” ku tandu Hii.
Iya madah, notis tesau dua minggu udah dibantai lalu pom nama chalun mayuh udah diambi.
“Kami melabaka chariman protem empat bengkah pampang tu, dipelabaka deka terus ngiring parti tu,” ku Hii seraya madahka kaban parti chukup gagit nganti haribulan nya, pengudah krisis politik ke nyadi ngelama tu lalu ngujungka dibuka parti baru.
UPP ditumbuhka Dato Sri Wong Soon Koh, pengudah laya nyadi entara ketuai dalam SUPP, nyentukka bala kaban parti pambar.
UPP udah nya dikemendarka ROS lalu sekeda pengari rayat SUPP nitihka singkang Wong dalam UPP.
Sida tu iya nya Kaban Kunsil Nengeri (ADUN) Bengoh Datuk Dr Jerip Susil, Dr Johnical Rayong Ngipa (ADUN Engkilili) enggau Ranum Mina (ADUN Opar).
Berebak enggau pemutus ROS, penumbuh UPP di serata nengeri dipeda chukup jampat baka kulat tubuh pengudah ujan.
Tebal agi parti tu diatu benung ngelatih bala sida ke biak-biak dikena ngenegapka parti.
Taja pan bedau nyemetak diterima dalam serakup Barisan Nasional (BN) tang Wong enggau bala kaban UPP ke bukai tetap deka ransing ngereja pengawa dikena napi Pengawa Bepilih Besai Nengeri ke dijangka taun 2016.
Kenu ku Wong, UPP udah baka diri sebilik BN lalu semua pengari rayat UPP agi mengkang begulai enggau BN.