KUCHING: Sarawak dipilih nyadi tuai rumah Program Retreat Pemuda Barisan Nasional (BN) Malaysia ti berengkah diatur seharitu 21 nyentuk 23 November tu, ditu.
Sapit Ketuai Raban Nembiak parti Pesaka Bumiputera Bersatu (PBB) Nengeri Gerald Rentap Jabu madah, program ti berambaika leka jaku ‘Jiwa Politik Masa Hadapan Gagasan Malaysia’ deka ngempuruka urung 350 iku kaban ari 13 buah komponen BN ari serata Malaysia sereta pengari ari tiga buah Gerempung Ukai Dikuasa Perintah (NGO).
Nitih penerang Rentap, program nya diatur Raban Nembiak BN Sarawak mungkur semua komponen BN baka PBB, Parti Rakyat Sarawak (PRS), Parti Sa’ati Rayat Sarawak (SUPP) enggau (Parti Demokratik Progresif Sarawak) SPDP.
“Program Retreat Nembiak Barisan Nasional (BN) Malaysia tu deka dipenyadika Kepala Menteri Datuk Patinggi Tan Sri Adenan Satem berebak enggau pengawa makai malam, malam tu, 21 November.
“Tuju program tu kena merambu pengawa enggau polisi timpuh panjai pejalai tauka pemansang Raban Nembiak BN nengah pejurai keretas kereja enggau woksyop.
“Nyerumba program tu, bisi empat keretas kereja enggau woksyop diatur, entara pekara ti dikerandauka iya nya Gagasan Malaysia, Pengukuhan Pemuda BN, ekonomi enggau kos pengidup sereta penyerakup bansa sereta sekeda isu bukai.
Rentap ti mega Chairman Komiti Pengatur mansutka pekara nya dalam aum pengarang berita Program Retreat Pemuda Barisan Nasional (BN) Malaysia, ti diatur ba bilik aum Indu Opis PBB ditu, pagi kemari.
Pengerami nutup program (22 November) tu deka dipenyadika Ketuai Nembiak BN Malaysia ti mega Menteri Nembiak, Lumba enggau Main Khairy Jamaluddin sereta disempulang Ketuai Raban Nembiak BN Negeri Sarawak ti mega Menteri Kerja Raya Datuk Seri Fadillah Yusof, ku iya.
“Ngarapka nengah program tu kami deka bisi resolusyen ke lalau sereta polisi pejalai tauka pemansang raban nembiak BN kena napi pemar politik jemah ila,” ku iya.
“Ba hari kepenudi (23 November) pesereta bejalaika program servis raban bansa ba tiga buah genturung pendiau iya nya Kampung Gersik, Kampung Tupong Batu enggau Kampung Sungai Apong,” ku iya.
Kelimpah ari PBB, PRS, SPDP enggau SUPP, komponen BN bukai ti sama datai masuk program tu iya nya UMNO, MCA, MIC, GERAKAN, Parti Progresif Penduduk Malaysia (PPP), Parti Bersatu Rakyat Sabah (PBRS), United Pasok Momogun Organization Sabah (UPKO), Parti Liberal Demokratik Sabah (LDP) enggau Parti Bersatu Sabah (PBS).
Pengari NGO iya nya Parti Barisan Kemajuan India Malaysia (IPF), Kongress India Muslim Malaysia (KIMMA) enggau Parti Makkal Sakti Malaysia (SAKHTI).
Bisi datai dalam aum pengarang berita nya kemari Ketuai Pemadah PRS Bit Surang ti ngarika PRS enggau Felix Tan ngarika SPDP.