Dikarang Rengenyan Labang enggau Jacqueline David //
NADAI ELAWIN PINCHIN UNGKUP KK&KM: Jabu enggau Menteri Wang Kedua ke mega nyadi Menteri Opis Kandang Menua, Dato Sri Wong Soon Koh, lebuh ke ngulu Aum Kunsil Nengeri ba hari ke-3 kemari.
KUCHING: Naka ke diatu, Perintah Menua nadai merambu deka meri elawin pinchin ngagai Ketuai Genturung Pendiau/ Tuai Rumah enggau Ketuai Raban Bansa (KK&KM) ke udah abis timpuh mangku pengawa sida iya.
Sapit Kepala Menteri ke mega Menteri Pemansang Menua Pesisir madah, nya laban pangku pengawa KK&KM ukai pangku pengawa ke tetap baka pengereja pengawa ba opis Perintah.
Lebuh ke nyaut tanya tambah ari Kaban Kunsil Nengeri (ADUN) Ngemah (BN-PRS) Alexander Vincent bekaul enggau sekeda KK&KM ti bedau nerima surat chiri sida enggau seiti agi tanya, enti sema pangku pengawa nyadi KK&KM tu bisi ditambah perintah penyampau, ni maya perintah mantaika pekara nya?
Ku Jabu, “Enti bisi puang, Opis Pelilih Mit Menua ba sesebengkah sitak deka merambu sapa ke patut mangku pangku pengawa nya, ngambika perintah ulih berundingka pekara nya. Enti nitih, Opis DO ba sitak nya deka nganjung dua tauka tiga chalun nama, ngambika ulih dipansik sereta dipilih.
“Dalam pansik nya, pekara ke deka dibungkur nyengkaum penengkeman pangku pengawa KK&KM ba orang nya, tikas umur sereta pelajar. Kemaya hari tu, perintah begunaka KK&KM ti bisi pelajar ke lebih agi lebuh mangku pengawa nya, sida deka bejalaika pengawa ke bekaul enggau adat, opis perintah sereta pemerat bukai,” ku iya.
Pia ku iya, lebuh ke nyaut tanya ari Alexander ba Hari Aum Ketiga, Penggal Ke-4, Aum Kunsil Nengeri ke-17 ditu, kemari.
Jabu ke mega Menteri Betanam Betupi Moden madah, pengerai chalun KK&KM nya pan deka dikemerat lebuh sida minta mangku pangku pengawa nya.
“Taja pia, kitai deka ngemeratka peminta laban penyampau mensia diau di menua tu ke majak nambah, nya alai bisi opis ke bekaul deka ngemerat sereta betatika atur milih KK&KM.
“Bedau lama ke udah, laban bisi pemerat ke bansa Penan di menua pesisir tauka menua ulu di Baram, perintah udah ngemendarka seiku pemancha enggau lima iku pengulu ungkup raban bansa Penan,” ku iya.
Ba sentang KM, lebuh ke ngetu ari pangku pengawa nya ketegal pengerai tauka pekara bukai, perintah semina meri sida setipikit lalu enti amat KM nya nadai pemisi bukai dikena iya beridup, kitai bisi palan endur minta bantu nya, ku Jabu.
“Sida tau minta bantu nya ngagai Opis Pengintu Pengelantang Pendiau Mensia Mayuh (JKM) nitihka kategori ti dipinta sida,” ku iya.
Nitihka rikod, naka 30 Oktober tu tadi, pemayuh KK&KM ti enda disambung pangku pengawa bisi KM (16) enggau KK (392).
Kebuah pangku pengawa sida iya enda disambung laban timpuh nyambung nya enda dikemendarka, ningkilka diri ari mangku pengawa nya, ketegal umur enggau pengerai sereta parai.
Nitihka rikod, elawin ke diterima KK ninting bulan diatu bisi RM800 (bepun ari 1 Januari 2013), gaji KM baka Temenggung (Gaji Pemun RM1,500 sereta ditikika ninting taun RM40), Pemancha (Gaji Pemun RM1,200 ditikika gaji ninting taun RM30) sereta Pengulu (Gaji Pemun RM1,000 enggai ditikika gaji ninting taun RM20).