EPU, Opis Menteri, Opis Pengerai, JKR Nengeri Sarawak udah baum sentang kemaya projek sepital baru Sri Aman berengkah
SRI AMAN: Tinda projek ngaga sepital baru Sri Aman deka dibuka bulan Disember tu.
Menteri Muda Pemansang Menua Pesisir enggau Pengawa Berumah, Datuk Francis Harden Hollis madah, diatu piak ke bekaul benung nyendiaka dokumen tinda ngaga Sepital Baru Sri Aman ke disadang dibuka Disember tu.
Ku iya, Unit Perambu Ekonomi (EPU) Opis Menteri, Opis Pengerai Nengeri Sarawak enggau Opis Kereja Raya (JKR) Sarawak udah baum sentang projek ngaga sepital baru Sri Aman minggu nyin tadi.
“Berindik ari aum nya tinda projek ngaga sepital nya deka diayan ngagai mensia mayuh Disember tu ngambika pengawa ngaga projek nya ulih berengkah,” ku iya.
Harden ke mega Kaban Kunsil Nengeri (ADUN) Simanggang bejaku munyi tu nimbal penerang ti dikeluarka Chairman Parti Tindakan Demokratik (DAP) Sri Aman, Leon Jimat Donald bekaul enggau isu projek sepital baru nya dalam sebuah surat kabar bedau lama ke udah.
Ulah Leon ti nyungkit isu nya kena ngulihka pablisiti seraya ngangkatka nama iya enggau DAP ba rayat di Sri Aman.
“Taktik penyakal endang baka nya. Sida nguji nyungkit isu angat ke bekaul enggau projek di media kena ngulihka sukung politik ari rayat,” ku iya.
Berebak enggau nya, iya arap rayat di Sri Aman anang mudah tekuing runding enggau chara DAP nginti undi maya Pengawa Bepilih Kunsil Nengeri (PRN) ke deka datai tu ila.