DATAI BARU ILA: TR Daniel (kiba) nyuaka tepa ngagai Dahim maya ke nemuai ngagai kebun limau ba Sungai Ilas, Bintangor, empai lama tu tadi.
BINTANGOR: Opis Betanam Betupi Pampang Sarikei enggau Meradong udah nemuai ngagai kebun limau enggi peranak rumah panjai Daniel Berahim di Sungai Ilas, Bintangor, empai lama tu tadi.
TR Daniel maya tu bisi madah, pemesai tanah alai sida serumah nanam limau kira bisi 50 ikar.
Ku iya, limau ke ditanam sida suah agi dijual diri empu kelimpah dibai ngagai menua bukai baka Kuching.
“Pengawa kami ke bekebun tu bisi disaup Opis Betanam Betupi, Peladang enggau Lembaga Pemasaran Pertanian Persekutuan (FAMA),” pia ku iya madah.
Kelimpah ari nya, iya madahka sida serumah mengkang ngena perau diri empu tauka ekspres maya deka nyual limau ke pasar Bintangor.
Penemuai tu disempulang Residen Sarikei Dahim Nadot, Pemesai Opis Pelilih Menua Meradong Mastapha Julaihi, Penghulu Augustine Pau, Pemesai Opis Betanam Pelilih Meradong Methew Bato, bala tuai rumah enggau bala bukai.
Raban sida bisi dibai nemuai meda kediri kebun limau enggi peranak Rumah Daniel.
Berebak enggau tu mega, bala ke bisi datai ngena awak nya begulai sereta berandau enggau lebih 200 iku bala ba menua nya kelimpah sida rumah Daniel.