BINTULU: Rayat ke ngembuan hak Tanah Adat Bansa Asal (NCR) ke udah nerima surat ngempu tanah nya ari perintah nengeri dilalau ngambika nguna tanah nya enggau naka pemanah.
Lalau nya dipansutka Menteri Muda Rengka Rama (Elektrik enggau Penyambung), Datuk Dr Stephen Rundi Utom.
Nitihka penerang ari Rundi, sida ke ngempu tanah nya patut ngatur pekara ke patut ba tanah nya nyengkaum nguna tanah nya enggau chara betanamka sekeda utai tumbuh ke ulih ngenataika pemisi ngagai sida.
“Reti ku aku nya tadi minta kita sama bela berunding ngemansangka tanah nya sekalika nengah chara nyeretai projek pemansang tanah, betanam betupi chara mit sereta mayuh agi program pemansang ke bukai ke ulih ngenataika penguntung,” ku iya.
Rundi mansutka lalau nya lebuh bejadi pengawa nyuaka surat pala tanah Seksyen 18 enggau Warta Seksyen 6 Kanun Tanah Nengeri ke diatur ba Balai Raya Sebauh, pagi ensana.
Beserimbai enggau pengerami nya, Rundi nyuaka surat pala tanah ngagai rayat di menua Pandan nyengkaum Rumah Iba Abas, Kampung Pandan, Kampung Maskat sereta rayat di Rumah Aying Mula di Sungai Jelalong Tubau.
Kelimpah ari nya, Rundi madahka inisiatif ke diberi perintah nya sebengkah kelai penyiru perintah ke ngungkupka tanah adat ngagai rayat sereta ngenukuka sida ke bempu tanah nya ngambika nguna tanah nya enggau manah.
“Enti kita ke bempu tanah NCR ulih ngemansangka tanah tu enggau manah, kita deka nerima mayuh penguntung ke besai berindik ari sektor betanam betupi kelebih agi nanam kelapa sawit majak mansang sereta dipeda ulih ngenataika mayuh penguntung ngagai rayat kemaya hari tu,” ku iya.
Pengawa nyukat tanah ke dipejalaika perintah nengah Opis Tanah enggau Survei (JTS) enda ulih ngenataika penguntung enti sema sida ke bempu tanah nya enda ngemansangka tanah sida enggau mayuh bengkah chara.
Nya alai, entara jalai ke manah ti patut diambi sida ke bempu tanah tu iya nya nyeretai projek pemansang tanah nengah chara ngemendarka tanah sida dikemansangka raban pengemansang ke udah dipilih enggau betanamka sawit ba tikas ke besai.
“Aku meda program pemansang tanah sechara begempung tu ulih ngenataika penguntung ngagai sida ke bempu tanah nya sereta ulih nyungkak pemanah tikas pengidup sida nengah agih dividen ke diberi raban pengemansang tanah nya nitihka peratus ke udah ditetapka ba surat janji,” ku iya nandu.
Sama bisi datai ba programi nya, D.O Pelilih Menua Bintulu, Tuah Suni, Temenggong Utong Sigan sereta Pengulu Michael Lanyau Ruma.