SRI AMAN: Kaban Kunsil Nengeri (ADUN) Simanggang, Datuk Francis Harden Hollis madahka politik ke dikemeranka perintah Barisan Nasional (BN) nya ukai politik ke ngerusak pengidup rayat tang politik ke ngemeratka pemansang rayat di menua tu.
Ku Harden, perintah BN seruran ngemeratka polisi pemansang ke ulih ngenataika penguntung ngagai semua rayat enda ngira bansa tauka pengarap.
“Polisi kitai dalam perintah BN semina seiti aja, iya nya ngemansangka pengidup rayat. Perintah BN seruran mendingka sebana rayat sereta enggau naka ulih mutarka penusah ke bisi nuntung rayat.
“Kitai dalam perintah BN ukai sebaka piak penyakal ke semina pandai nabur jaku kusung di sebarang alai, tang kitai seruran bejalaika pengawa enggau naka ulih kelimpah ari ngamatka semua janji ke disemaya enggau rayat,” ku iya.
Harden ke mega Menteri Muda Pemansang Menua Pesisir enggau Pengawa Berumah Sarawak mansutka jaku nya lebuh ngulu Program Walkabout ke diatur ba Rumah Jeluka, Kampung Suang, Sabu ditu, kemari.
Ku iya, rayat patut muka runding sida sereta meri sukung ke chukup tegap ngagai perintah BN berindik ari lebih mayuh pemansang ke patut dikembuan sida begulai enggau perintah BN nyengkaum jalai alun, bekal ai beresi, kuasa karan sereta perengka pemansang ke bukai.
“Semua pemansang ke dikembuan rayat kemaya hari tu datai ari perintah BN, ukai ari piak penyakal.
“Piak penyakal semina landik nabur janji manis dikena manjuk penyinu ari rayat,” ku iya.
Kitai patut nemu, piak penyakal semina ayan bisi dipeda lebuh maya pengawa bepilih aja. Tang lebuh abis pengawa bepilih, sida deka diau jenuh sereta enda engkebut tajapan nemu penusah ke ditapi rayat. Piak penyakal tu tau disempamaka enggau leka jaku “Baka kulat ke tumbuh pengudah ujan,” ku tandu Harden.
“Enti sida beamat deka nulung rayat, nama kebuah sida diau diri aja lebuh maya ukai pengawa bepilih?
“Perintah BN patut dijadika chunto ke chukup manah laban seruran beratka rayat enda ngira maya,” ku iya.
Nya alai, perintah BN seruran ngamatka janji ke disemaya enggau rayat sereta bekereja enggau naka ulih kelimpah ari nyaga pengelantang rayat,” ku iya nandu. Sama bisi datai ba program nya, Sapit Tuai Raban Nembiak Parti Rakyat Bersatu Sarawak (SUPP) pampang Simanggang, Patrick Micheal Malajin, Kaunsilor Walterkiller James Junit, Tuai Rumah Kedeny ari Kampung Beleti, Tuai Rumah Japing ari Kampung Nyakai sereta raban komiti JKKK ke bukai.
Beserimbai enggau program nya, Harden nyuaka geran bantu ari perintah ke beungkus RM6,000 ngagai JKKK rumah panjai nya dikena sida bejalaika aktiviti sepanjai taun.