KUCHING: United People’s Party (UPP) udah ngarika raban ke ngutuk pengawa ‘bloggers’ ti ngenakutka Kepala Menteri, Datuk Patinggi Tan Sri Adenan Satem.
Ketuai kaban komiti parti nya, Dr Johnical Rayong Ngipa madah: “Utai ke dipansutka nya ukai semina enda bebasaka Kepala Menteri tang mega sebaka enggau ngereja pengawa jai.”
Iya arapka polis ulih nasat pekara nya enggau silik sereta nangkap orang nya, ku Rayong seraya madahka diri nyukung pengawa ngaga ripot polis ti dikereja Pampang Nembiak PBB Lambir pasal ‘bloggers’ nya di Balai Polis Miri.
Kena Hari Satu tu tadi, Ketuai Nembiak Pampang PBB Lambir, Imong Gani udah minta polis mansik orang ti ngenakutka Adenan. Sida ngutuk ‘bloggers’ ti nempa utai sengapa, nyadung pemula sereta nuduh sengapa.
Kelimpah ari nya, Saberkas Pampang Miri mega sama bisi ngaga tiga iti ripot kena Hari Satu bekaul enggau “jaku pejal mati”. Ku orang ke nemu pasal pekara nya, Yusuf Mohammad, “jaku pejal mati” ke dibantaika nya ditemu sida kena 22 Ocktober tu tadi dalam ‘Facebook’.
Sida pechaya jaku pejal nya digaga laban bisi sekeda orang ke enda lantang ati enggau jaku Kepala Menteri maya ngintu pengerami Hari Malaysia ke diatur di Miri kena 16 September tu tadi.