KUALA LUMPUR: RM19.78 biliun ungkup belanja udah dikemendarka Perintah Besai dikena bejalaika projek pemansang di Sarawak kenyau ari bulan Januari 2010 nyentuk ke 28 September tu tadi, pia ku Dewan Rayat dipadah ba aum ke diatur kemari.
Menteri ba Opis Kepala Menteri Datuk Seri Shahidan Kassim madah nya ungkup belanja ke pemadu besai enti dibanding enggau ke diterima nengeri bukai dalam timpuh nya.
Penyampau nya nyengkaum agih belanja ungkup pemansang ke beungkus RM312.42 juta ungkup Parlimen Sarikei ba timpuh ke sama, pia ku iya lebuh ke nyaut tanya ari Wong Ling Biu(DAP-Sarikei) di Parlimen ditu.
Wong deka nemu penyampau agih belanja ungkup pemansang ke diberi perintah besai ngagai nengeri Sarawak, nyengkaum Parlimen Sarikei, dalam timpuh lima taun ke udah.
Ku Shahidan, Perintah Besai udah ngemendarka penyampau agih belanja ke besai laban ngira pemesai rampa menua tu enggau penyampau rayat ke majak mayuh.
“Sarawak diatu entara tiga buah nengeri maju di Malaysia. Kami ukai semina mai pemansang, tang mega nentuka nya diasaika rayat Sarawak,” ku iya. — Bernama