BETONG: Tuduh ti madahka bala nembiak ba Maktab Rendah Sains Mara (MRSM) ditu ke dipejal merap jalai pengarap Islam nya enda amat.
Prinsipal Maktab nya, Zabidin Bedut bekeras nyeliahka tuduh nya sereta madahka nya digaga orang ke jai runding sereta bula.
Iya madahka pekara nya digaga ketuai penyakal sereta dibantaika ba surat kabar apin lama ke udah.
Ketuai penyakal nuduh, sekeda apai indai madahka diri berasai irau ati laban bisi pengawa nguji ngumbuk nembiak ukai Islam merap jalai pengarap Islam sereta enda ngemendarka sida mai Bup Injil ke kolej lalu mejal nembiak ke ukai Islam ngena ‘songkok’.
“Semua jaku tuduh nya bula magang. Pengamat iya kami ukai semina ngemendar tang meransang semua bala nembiak ngemeranka jalai pengarap sida,” pia ku iya ba jaku pengelalu maya pengerami Graduetsyen sereta nyuaka Perais kolej ti Ke-5 ensanus.
Kami mega ngemendarka nembiak Keristin ngena bas kolej ke gerija kena Hari Minggu,taja pan enti nitihka atur kolej pekara nya enda dikemendarka, tang kami bebatak asur ngambi pulaika pemaik ngagai komuniti kolej,ku iya.
“ Anang irau, nadai sebarang pengawa ke bekaul enggau Islam tauka bechiping ati nyadi ba MRSM ditu,” pia ku iya seraya ditempikka urung 500 iku apai indai nembiak jari ke ngulu pengerami nya.
Lebuh ti ngenang pasal pekara ke sama, Menteri Kebun Dandang Besai enggau Komoditi, Datuk Amar Douglas Uggah Embas ke nyadi temuai dipebasaka ba pengerami nya madah, ukai pekara ke baru ninga jaku tuduh ari penyakal ti deka ngulihka sukung ba politik.
Penyakal endang landik ba pengawa nyadung petenah bejaika perintah Barisan Nasional (BN), ku Uggah.
Perintah BN endang seruran bebendar deka ngenegapka penyerakup ba pupu raban bansa laban semina nengah pemereti ati ba pekara nya aja ulih nentuka pengelantang enggau penyenang,ku Uggah.
Uggah arap pekara ti ditukuka zabidin ulih nyeliahka pengirau ati apai indai bekaul enggau jaku tuduh nya.