KUCHING: Seiku perumpak nyau melempai ba katil sepital pengudah motosikal ke dikena iya tepawah maya ti ngelarika pengudah nyerungkai sebuah rumah ba sebengkah genturung pendiau di Batu Kitang ke ngujungka iya bakal ba jari enggau kaki, kemari.
Saspek ke beumur 37 taun ari Kampung Haji Baki nya didawa nyerungkai sebuah rumah urung pukul 10.30 pagi sereta nanggung seiti televisyen ke dibalut enggau kain belachu, maya nya iya bisi dipeda orang bukai ke berimbai pendiau.
Laban nemu diri, udah dipeda orang saspek berumban nepan motosikal Modenas Jaguh lalu deka lari maya orang ke diau ba kandang genturung pendiau nya ngagai sereta deka malu iya.
Pekara nya ngujungka saspek enda tetanka motosikal sereta ngujungka iya rebah lalu ditanchang mensia mayuh sebedau ke madah ngagai polis.
Seraban polis datai ba palan penusah nyadi lalu mai saspek ngagai Sepital Besai Sarawak (HUS).
Saspek dipadahka bisi ngembuan rikod jenayah sereta kala ditangkap ketegal penyalah ke sebaka.
Polis mega bisi tetemuka televisyen ke deka dichuri sereta narit motosikal saspek ngambika dipansik.