NYADIKA PENGINGAT: Fadzli (kiba) nyuaka tepa ngagai Harden (tengah) seraya dikemataka bala temuai ke bukai ba sebengkah pengerami ke diatur ba SK) Paku, Undop, Sri Aman, kemari.
SRI AMAN: Pengajar ba menua pesisir chukup besai tanggungpengawa lalu sida patut nemu reti tranformasyen pelajar menua ngambika sida lebih chakah sereta bebendar gawa setipak enggau ubah pemansang menua.
Kaban Kunsil Nengeri (ADUN) Simanggang, Datuk Francis Harden Hollis madah, ba sentang pekara tu genap pengajar patut besaup enggau Gerempung Apai Indai enggau Pengajar (PIBG) awakka sekula nya ulih tejapaika pemujur setipak enggau ubah pemansang menua ke maya hari tu.
“Bala apai indai patut nemu ngemeratka pekara pelajar bala anak diri lalu anang kelalu ngelakka tanggungpengawa nya dilempai ke ngagai bala pengajar aja.
“Kebuah pia, laban bala anak kitai diatu dikeandal nyadi ketuai megai menua tu jemah ila,” ku iya.
Harden ti mega nyadi Menteri Muda Pemansang Menua Pesisir enggau Pengawa Berumah Sarawak madah munyi nya rambau bejadi Pengerami Ngintu Ulang Taun, Sekula Primari (SK) Paku, Undop, Sri Aman bepalan ba balai raya sekula nya ditu malam kemari.
Rambau pengerami nya mega, Harden sempat ngelalau semua piak patut besaup mantu perintah dalam pekara pelajar lalu anang ngembuan penemu semina ngarapka bantu ari perintah aja.
Iya madah, perintah udah mayuh nulung nyendiaka perengka enggau utai ke diguna sekula dikena ngemuntangka bala pengajar nyapai pemutus sekula ke penyulut.
Nya alai, ku iya pengajar patut nguna peluang nya endur ngangkatka agi pemanah nama sekula enggau chara ngadaka nembiak ke pemadu iya nyulut, ku tandu iya.
Sama bisi datai ba pengerami tu, Kepala Pengajar sekula nya Fadzli Mohd Edon sereta Yang Dipertua PIBG Sekula, Jampang Sabong, Kaunsilor Andar,sereta bala pengajar sekula nya.
Ba pengerami nya, Harden bisi nyadaka agih belanja RM 5,000 ungkup PIBG sekula nya enggau RM 5,000 agi diberi ngagai Chapel Saint John, Paku Undop.
Nangkan ke nya, enam buah JKKK di sitak ulu paku iya nya JKKK Rumah Beji, JKKK Rumah Bandi, JKKK Rumah Gunong, JKKK Rh Edward Jantong, JKKK Rumah Pilit enggau Rumah Wiss bela nerima agih belanja RM 5,000 lalu JKKK Rumah Sigan, Radau nerima agih RM 3,000.