KUCHING: Penerima midul George Cross,Awang Raweng patut diberi basa laban ti udah ngetanka menua lalu ukai ketegal iya kala gawa enggau rejimen British.
Opis Pemansang Tanah Tan Sri Datuk Amar Dr James Masing madah ex-soldadu penyidi Iban tu patut bisi nerima semua laban udah berambunka nyawa ngetanka menua maya ke charut kelia.
Maya menua tu betapi enggau raban kominis ke ngachau pengelikun enggau penyerakup menua, Awang udah dikangau sereta nadai betangguh ngetanka menua. Iya enggau pemerani ati udah ngetanka menua, lalu tu meh maya menua malas pengawa ti udah dikereja iya, pia ku menteri kanan nya.
Masing nyeliahka penemu sekeda orang ti madahka pengelantang pendiau sereta basa ke diberi ngagai Awang patut diserahka ngagai Perintah British laban iya udah dikangauka tama ngagai 1st Batallion Worcestershire Rejimen di Malaya ngetanka menua ari kominis.
“Bisi sekeda orang ti enda nemu reti basa enggau pemerani laban sida bisi bechiping ati enggau bansa bukai.
“Awang Raweng patut dipebasa sereta dibalas ketegal pemerani iya berambunka nyawa ngetanka menua tu. Kitai enda patut ngakim iya ketegal bansa tauka penatai. Iya soldadu ke berani sereta udah diberi perintah British gelar.
“Semua peranak menua Sarawak patut berasai temegah ati ketegal pemerani iya udah ngetanka menua, lalu pemerani maya beperang nya ditemu di serata dunya ke alai semua orang ti diberi basa nya patut nemu, ke lebih agi soldadu enggau veteran,” pia ku Masing madah ngagai The Borneo Post ensanus.
Presiden Parti Rakyat Sarawak (PRS), diatu benung nemuai seraya gawa ke menua China, enda nyebut nama orang ti mansutka penemu nya.
Awang udah diberi midul bujang berani berindik ari pemerani iya ngelaban urung 50 iku kominis di Johor. Iya dipasuk ngagai 10 Platun, “D” Kompeni lewbuh sida ke diserang dalam kampung ke alai dua iku ketuai ke mega raban platun nya, lesi bebadi tang iy semina bakal ba pah.
Kelimpah ari bakal, Awang mega udah nyelamatka Pvt G Hughes. Taja pan bisi bakal ba sepiak jari kanan tang iya tetap ngelaban kominis nya. Udah sida dikelingi kominis, Awang ngentun tuil grenade ngena jari sepiak kiba iya sereta lalu nyerang kominis nya. Pengudah 40 minit bebalas timbak, sida lalu nyuruntka diri.
Awang mega penerima Midul Queen Elizabeth II Diamond Jubilee enggau Pingat Jasa Malaysia. Peninggi gelas George Cross sama bela peninggi enggau Victoria Cross, gelar soldadu ke pemadu tinggi ngagai bala soldadu ari menua komanwel lebuh ke agi diperintah British kelia.
Awang diatu nyadi Tuai Rumah di Nanga Skrang, Sri Aman. Iya bisi nerima elawin ninting bulan ari perintah British enggau menua Malaysia.
Kena Hari Tiga tu tadi, The Borneo Post bisi mantai penerang ari Ketuai Publisiti Benbiak PRS, Bit Surang ti madahka p erintah patut ngungkupka gelar ke besai agi ngagai penerima tunggal Midul George Cross nya.
Ku iya, Awang patut diberi Pingat Gagah Berani (PGB) tauka Sri Pahlawan Gagah Perkasa (SP) sereta bantu ninting bulan iya mega patut ditiki ngambika setipak enggau gaya ekonomi ke diatu.