KUCHING: Ikan terubuk Sarawak ke dipesebut majak punas deka diberi setipikit kelai geografi (GI) ari Opis Reta Tengkira Malaysia berindik ari penyelai iya.
Pekara tu dipesetuju Kaunsil Pemadah Teknologi enggau Asil Penatai Sarawak.
Nitihka penerang Direktor Opis Betanam Betupi Sarawak Datuk Lai Kui Fong, entara penyelai ikan tu iya ngembuan isi ke manis sereta nyamai lalu semina bisi ayan ba kandang tasik pantai Sarawak ari Sematan nyentuk ke Lawas.
“Kandang endur ikan tu betelu iya nya ba nanga sungai Batang Lupar, Sri Aman enggau Batang Lassa, Mukah lalu dua kali betelu dalam setaun,” ku iya.
Iya madah, seiti agi penyelai ikan tu iya nya ulih betukar nyadi ikan terubuk indu maya umur iya udah tuai lalu ulih betelu.
Lai madah, utai bukai ke bela deka nerima setipikit ke sebaka iya nya berau bario, berau pusu Sarawak, berau bajong Sarawak, terung dayak Sarawak, longan gadung Sarawak enggau buah nyekak Sarawak.
Nangkan ke nya, tiga iti agi produk iya nya sayur kemiding enggau dua bansa berau tradisional agi nganti diberi setipikit GI. — Bernama