SERIAN: Penusah ke nuntung seiku apai orang ke beumur 58 taun, ke ngidap penyakit strok enggau anak indu iya beumur 31 taun ke ditepan penyakit bajung ngujungka iya enda dapat angkat sereta enda ulih bejaku balat meri penyinu ngagai sebengkah gerempung ukai perintah (NGO), iya nya Hope Place, Kuching.
Jemali, kala gawa nyadi pekereja am lalu nyaga anak indu iya Juliawati nyentukka iya nyau ditinggang penyakit strok urung dua taun ke udah.
Bini Jemali udah midang urung 20 taun ke udah.
Seduai menyanak diau ba sebuah rumah kayu ke udah lama begulai enggau seiku agi anak iya ke benama Malek.
Anak iya nya meh ke nupi seduai menyanak ke sama enda bepengerai. Kelimpah ari nya, sida menyanak balat bepanggai ngagai orang bukai ke berimbai pendiau meri pemakai enggau meri seduai mandi.
Juliawati seiku indu ke regas sebedau iya tabin maya umur 25 taun ke ngujungka iya bajung.
Diatu, Juliawati gegaring ba teluk bikuk lalu nadai saoa orang nulung ngujungka iya suah kemi ba endur ke gali.
Iya bisi nerima bantu ninting bulan ari Opis Pengintu Pengelantang Pendiau Raban Bansa (JKM), tang nya enda chukup dikena sida.
Nya alai, Hope Place apin lama ke udah bisi datai ngabas lalu meri barang pemakai baka berau, minyak makai, roti, mi, garam, gula enggau milo ngagai sida Jemali menyanak.
Taja pia, Hope Place ngasaika sida menyanak tu begunaka utai ti lebih ari barang pemakai.
Rumah kayu sida Jemali menyanak mega patut dikemanah, lalu utai ke pemadu beguna sida begunaka orang ke ngintu meri pemakai enggau meri mandi ninting hari.
Hope Place bisi nganjung barang bantu dua bulan sekali laban ruang bilik nya udah dirintai dalam penerima bantu sida.
Naka ke diatu, gerempung tu udah mujur mantu lebih 80 ruang bilik.
Penerang silik bekaul enggau chara minta bantu ari gerempung Hope Place tu ulih betelefon nuju 013-5672775 belabuh pukul 8.30 pagi nyentuk 12.30 tengah hari ninting hari Satu ngagai hari Lima.