PUTRAJAYA: Opis Menteri Pemansang Menua Pesisir enggau Kandang Menua (KKLW) deka nentuka agih ari Bajet 2015 dikena enggau manah awakka meri penguntung lebih agi dalam nyungkak ekonomi rayat menua pesisir di Sabah enggau Sarawak.
Menteri iya Datuk Seri Mohd Shafie Apdal madah, endang udah nyadi tanggungpengawa opis menteri nya endur nentuka bajet nya datai ba raban orang ke deka diberi.
“Nengkah rikod ke bisi dikembuan opis menteri nya, bajet ke sekali tu deka diperati enggau silik dikena nyeliahka iya dibasau ngapa laban bajet ke sekali tu mayuh agi ari taun ke udah.
“Semua rikod nya ngundan semua pejalai belanja ke diguna sereta dikemendarka nengah opis menteri tauka ejensi iya,” ku iya madah ngagai pemberita pengudah Pengawa Begelumu Ninting Bulan enggau Bejadi Kimpin Bulan Jaku Nasional tikas opis menteri ditu kena hari Empat tu tadi.
Dalam Bajet 2015 ke dibantai apin lama ke udah, KKLW bulih agih RM4.5 bilion niki agi enti dibanding enggau RM4.1 bilion ba Bajet 2014.
Kelimpah ari nya, Mohd Shafie madah taja pan pengawa meri projek agi nitihka atur tendar tebuka, tang Opis Menteri iya tetap ngemata dikena nentuka kompeni ke patut aja tau bulih.
“Kitai enggai meda bisi projek tejanggal, laun tembu tauka tembu enda meruan,” ku iya. — Bernama