BINTANGOR: Penanggul ke nuntung rayat enda nemu badu enti semina enggau chara mantaika pengurang perintah.
Pekara ke patut digaga piak ke betanggungjawap iya nya nimbal genap bantah ke bisi dibantai nengah pengawa ke bisi dipeda, laban nengah chara baka nya baru penanggul ke bisi nuntung rayat ulih diputar, ku Ketuai Barisan Nasional (BN) P208 Sarikei, Ding Koung Hiing.
Ding madah, iya nemu penanggul ke bisi nuntung rayat ba sitak nya, ke nadai agi palan endur mantaika sebana sereta alai mutarka sesebengkah penanggul ke bisi nuntung.
“Kenyau pengarap nya dipandangka nengah sukung ngagai raban penyakal. Gaya utai ke nyadi tu ngujungka pengawa kami deka mantu rayat diasaika chukup mar.
“Tang semua nya nadai ngemuntanka ayu ketuai BN ke bukai meri bantu ngagai rayat ba sitak tu,” ku Ding lebuh ngabas sekeda palan semak ditu, kemari.
Rambau penemuai nya, Ding bisi nyuaka pemeri ari kuchik iya empu RM10,000 ngagai Opis Kaunsil Pelilih Meradong Julau (MDMJ) dikena sida ngemanah sereta meresi sistem parit ba sekeda endur ke bisi penanggul.
Berebak enggau nya, Ding ngarapka nengah bantu nya ulih mutarka sekeda penanggul ke bisi nuntung bekaul enggau sistem parit ke suah nyadi isu raban orang ba endur nya.
Sama bisi datai rambau pengawa tu iya nya Pemesai Pelilih Meradong, Mastapa Julaihi Sekretari MDMJ, Adrian Luang, Kapitan Ngu sereta sekeda rayat ke semak menua nya.