KUCHING: Sebarang penyalah ti digaga konteriktor lebuh ngaga rumah ke enda nitihka spek Danji Jual enggau Beli (S&P) tau dibantah, lalu enti enda digaga konteriktor nya manah agi, pekara nya tau dikompelin ngagai Tribunal Kelim Pemeli Rumah Sarawak (TTPRS).
Chairman tribunal Dato Hajjah Maznah Dasmi lebuh nyadi ketuai akim ba kes bechara seiku pemeli ke ngaga kompelin ngagai tribunal ketegal konteriktor enda nitihka spek baka dalam Danji S&P madahka tribunal ukai ngarika sapa-sapa dalam tiap kompelin tang enti bisi penyalah, iya patut didinga dalam kot tribunal nya besaksika konteriktor sereta injinir ke meresa projek nya.
“Kot Tribunal mendingka kededua piak, nadai ngarika sapa-sapa. Kami pan enggai pemaju rumah betapi enggau penanggul tang kami mega patut mendingka sida ke ngaga kompelin nya…..sama-sama adil,” ku Maznah.
Maznah madah munyi nya lebuh Kot Tribunal Kelim Pemeli Rumah (TTPRS) mutuska pemaju rumah patut ngemeratka tanggungpengawa berindik ari pengawa ti digaga sida iya ke enda nitihka spek S&P ti dikompelin ulih seiku pemeli rumah nya, Abdul Rahman Redhuan.
Berindik ari asil peresa raban injinir Opis Menteri Pengawa Rumah, ke nyadi injinir dipilih diri, konteriktor ke ngaga rumah nya diasuh ngaga baru, sebarang pengurang tauka gaga nitihka spek S&P dalam kandang sebulan tu, belabuh ari abis pemutus bechara nya.
Pemutus nya digaga Maznah pengudah becharaka kes rumah ti dibeli tang sekeda perengka guna ti dikena ngaga rumah nya enda nitihka spek di Taman Cherrywood, Jalai Matang Baru, di Kot Tribunal TTPRS di Komplek Dewan Undangan Negeri Lama di Petra Jaya ditu, ensana.
Atur undang-undang TTPRS enda tau enda diturutka kededua piak, pemeli enggau konteriktor, baka ke udah diputuska nengah Aum Kunsil Nengeri (DUN) tu tadi, alai pemeli rumah bisi hak sida iya empu enti sema rumah ti dibeli nya enda nitihka danji S&P tauka enda ulih tembu dalam kandang timpuh ke patut, baka ke udah disemaya tauka pemeli rumah enda nitihka semaya nitihka S&P konteriktor.
Iya madah pemutus nya digaga pengudah ari peresa ngagai palan tauka genturung pendiau ulih injinia ari Opis Menteri Rumah ke meresa projek rumah orang ke ngaga kompelin nya kena 22 September tu tadi.
“Injinir madah, sekeda perengka guna sereta infrastruktur rumah nya rusak ukai ketegal gaya rumah nya digaga lalu ukai ketegal pengerusak ti ditemu di rumah nya, laban gaya rumah nya bisi nyelai,” ku iya.
Berindik ari nya, konteriktor diasuh ngaga manah baru rumah nya nitihka spek S&P dalam kandang sebulan tu, lalu enti sema enda mujur digaga manah, pemeli rumah nya tau ngambi konteriktor bukai lalu semua caj enda tau enda dibayar konteriktor ke empu projek nya.
“Nya alai, sebulan ari diatu, semua perengka guna tauka infrastruktur rumah nya ke enda nitihka S&P, enda tau enda digaga dalam kandang sebulan, lalu enti enda digaga, pemeli rumah nya bisi hak ngambi konteriktor bukai lalu sebarang bayar ari nya mesti dibayar konteriktor projek nya,” ku Maznah.
Sama bisi enggau Maznah ngemutarka kes nya, dua iky panel TTPRS, Robert Elone Sireng, Bexter Agas Micheal, raban injinir ari Opis Menteri Rumah, kontraktor ke ngaga rumah nya sereta pemeli rumah nya empu.
“Ambika chunto, enti sema projek rumah dipadah deka tembu dalam kandang 24 bulan, lalu udah ngelui timpuh nya, bedau mega tembu, tau ngujungka konteriktor nya diasuh mayar penalti tauka ukum baka ke disebut dalam Danji S&P,” ku iya.