KAPIT: Sapit Menteri Pemansang Menua Pesisir enggau Kandang Menua, Datuk Alexander Nanta Linggi meri awak iya begulai sereta ngerapitka kaul enggau rayat di parlimen P 215 Kapit sereta mungkur sitak N 54 Pelagus enggau sitak N 55 Katibas berengkah ari 2 Oktober 2014 tu tadi.
Sepemanjai nyadi Sapit Menteri Pemansang Menua Pesisir enggau Kandang Menua, Alexander ngembuan tanggungpengawa rasmi ke chukup berat ngarika rayat ba Dewan Parlimen di Putrajaya.
Iya meri awak betemu enggau rayat di pelilih menua Kapit sebedau Aum Dewan Parlimen beserimbai enggau pengawa bejuraika Bajet 2015 kena 10 Oktober tu tadi.
Ba penemuai iya betemu enggau rayat di Kapit, iya mega meri penerang ke silik bekaul enggau GST sereta rega minyak petrol ke niki empai lama ke udah awakka rayat di menua tu enda sanggu penemu sereta enda nambur jaku petenah ke enda tentu menuku.
Beserimbai enggau awak penemuai iya ngagai Katibas, mayuh bengkah atur pengawa bisi digaga nyengkaum bejadi pengawa miring dikena bejadi jematan Katibas ke deka digaga enda lama agi kena 2 Oktober tu tadi.
Jematan tu ila diadang ulih meri mayuh penguntung ngagai rayat di Kapit sereta rayat ke diau di Pasar Song.
Kelimpah ari nya, Alexander bisi ngulu sebengkah penerang ‘Song District Action Committee’ ke diatur D.O Pelilih Menua Song Jackline August ba Opis Pelilih Menua Song.
Pengawa nya dikemujurka enggau sebengkah atur pengawa iya nya program Dermasiswa (Badan Amal Dan Kebajikan Tenaga Isteri-Isteri (BAKTI) ke nyuaka intensif ngagai lima iku nembiak sekula ke belajar ba SMK Song kena 3 Oktober tu tadi.
Beserimbai enggau program nya, iya mega nyuaka bantu belanja ngagai raban bansa Melayu enggau pengarap Islam di menua nya dikena meli dua iku chapi beserimbai enggau pengerami ‘Hari Raya Aidiladha’ empai lama ke udah.
Kena 3 nyentuk ngagai 5 Oktober, iya mega bisi nemuai sereta betemu enggau rayat di sitak Pelagus.
Ba penemuai nya, iya bejadi pengawa nyuaka bantu insentif Dermasisiwa(Badan Anmal Dan Kebajikan Tenaga Isteri-Isteri BAKTI) dibaruh sitak Parlimen P215 Kapit ngagai lima iku nembiak sekula ke besekula di Kapit. Tiga iku ari sida ke diberi bantu tu besekula ba SMK Kapit sereta dua iku besekula ba SMK Kapit 2.
Program nya diatur ba sebengkah hotel ke chukup tebilang di Kapit.
Ba program nya, nembiak sekula ke nerima insentif nya diberi bantu mata duit RM600 ungkup ngagai sesiku sida.
Nitih ke penerang ari Alexander, nembiak ke dipilih nerima insentif Dermasiswa BAKTI asil ari undi raban pengajar di sekula nya sereta dipilih nitihka pematut.
Iya mega madah, raban komiti BAKTI diberi awak nyendiaka bantu sida ngagai nembiak sekula ke dipegai parlimen sida ke ngungkupka 10 iku penerima.
Tu ngungkupka lima iku penerima ari parlimen Kapit iya nya ari SMK Song ke dipegai sitak N55 Katibas sereta lima iku agi ari SMK Kapit (3 iku) enggau SMK Kapit 2 (2 iku) ke dipegai sitak N54 Pelagus.
Kelimpah ari nya, Alexander bisi nemuai ngagai sekeda rumah panjai nyengkaum Rumah Manok Mancha, Lebok Mawang, Ulu Sungai Yong seraya bejadi program ‘Rumah Panjang Bebas Denggie’ ke diatur raban Opis Pengerai.
“Dalam kandang dua tiga ti ke udah, aku bisi bejadi mayuh bengkah program di Song enggau Kapit sebedau Dewan Parlimen berengkah beaum baru minggu siti tu ila.
Di Song, aku ngulu program ‘District Action Committee’ ke diketuai D.O Pelilih Menua Song Jackline August.
Nangkanka nya, aku mega bejadi pengawa miring dikena ngemunka Jematan Katibas ke deka digaga enda lama agi sereta bejadi pengawa nyuaka bantu intensif ngagai nembiak sekula beserimbai enggau program ke diatur raban BAKTI.
Pengudah program nya, aku terus ke Palan Penyangkai Bilun Bintulu dalam awak nyambut penatai bangkai niang Meling Anak Mula ari menua Amsterdam ke bebadi dalam penusah bilun MH17 empai lama ke udah,” ku iya.
Iya mantaika penyiru beratka rayat sereta enda kala melakangka peminta rayat ke beguna ke iya kelebih agi dalam mutarka pengawa.