PENGGI NUAN: Wilson nyuaka setipikit ngagai Tuai Rumah Meliyu.
KAPIT: Sekretari Politik Kepala Menteri Sarawak, Wilson Nyabong ngelalau peranak menua ditu ngemeratka pengerai diri kena nyeliah macham bengkah penyakit. “Pengerai ke manah sempama pengeraja, tang pengeraja enda ulih ngenataika pengerai enti enda dikemerat ari pun. Kitai patut nemu nyelihaka sebarang penyakit ari ngelekai laban pengawa ngubat nyadi mar enti kitai udah ditepan penyakit.
Nya alai, rayat di menua tu dipinta seruran nyaga pengerai enggau pemeresi alai diau ngambika enda muntang dirampit igi penyakit.
Kelimpah ari nya, pemansang menua tu mega deka muntang digapai enti rayat ngembuan pengerai ke manah,” ku iya.
Wislon mansutka jaku nya kebuh bejadi pengerami nutup ‘Komuniti Sihat Perkasa Negara’ke diatur Sitak N54 Pelagus sepemanjai dua hari nya di Pusat Sivik pagi Hari Dua tu tadi.
“Program tu diatur dikena mantu rayat menua pesisir sereta sida ke diau jauh ari kelinik enggau sepital. Nengah program tu, rayat di menua pesisir deka nerima mayuh penemu ke beguna bekaul enggau pengerai nyengkaum chara nyeliahka mayuh macham bengkah penyakit baka sakit kemi manis, tinggi darah, sakit riman, sakit tungkul atau enggau mayuh ke bukai,” ku iya.
Program tu mujur diatur raban Opis Pemansang Raban Bansa (KEMAS) sereta dibantu Opis Pengerai Kapit (KHD). Urung 60 iku penyereta bisi enggau ngambi bagi ba program tu ke mungkur sembilan buah rumah panjai enggau tiga buah genturung pendiau.
Kelimpah ari nya, Pemesai Opis Pemansang Raban Bansa, Siti Ja’Ismail madahka program nya mengkang dipejalaika sereta udah mujur diatur ba pelilih menua Sitak N55 Katibas minggu siti nyin kemari.
Entara tuju atur pengawa program nya, dikena ngelatih rayat ke diau di menua pesisir kelebih agi sida ke diau di rumah panjai chara nyaga pengerai ba genturung pendiau sida kelimpah ari bejalaika tanggunjawap sida enda milih maya.
“Mayuh bengkah penyakit ulih diseliah enggau ngemeranka chara idup ke beresi sereta nyaga pengerai diri empu,” ku iya.
Beserimbai enggau program nya, mayuh bengkah atur pengawa bisi dipejalaika nyengkaum licha sereta meri penerang ke silik bekaul enggau tuju program nya ke dikenataika raban Opis Pengerai Kapit , MA Felix Thompson, MA Daniel John, MA Alphonses Tinda, MA Wan Zakiah sereta mayuh agi ke bukai.
Seiku peranak Rumah Manok Mancha, Panting Gindam mantaika pengaga ati iya pengudah ngulu program nya ke dipeda meri mayuh penguntung ngagai iya sereta penguntung nya deka dikunsi iya enggau raban rumah panjai ke bukai.
Iya madahka raban Opis Pengerai bisi ngatur sebengkah program ke dikumbai ‘Panjai Bebas Dengie’ke diatur ba Rumah Manok Mancha dikena muka runding rayat di rumah panjai nya awakka seruran ngemeranka pengerai enda milih dini alai sida diau.
Mayuh program bisi diatur beserimbai enggau program nya nyengkaum gutung-ruyung ke diatur Komiti Pemansang enggau Pengelikun Genturung Pendiau (JKKK) Rumah Meliyu di Sungai Sesibau.