KUCHING: Perintah patut ngayanka penyiru meri ungkup sereta gelar ke besai agi ngagai Awang Raweng, penerima tunggal midul ‘George Cross’ ari menua tu.
Ketuai publisiti Nembiak Parti Rakyat Sarawak (PRS) Bit Surang madah, Awang suah enda disengkaum begulai enggau bala VIP, bala bujang berani bukai lebuh ke dikangau ngulu pengerami baka Hari Merdeka tauka Hari Malaysia, kelimpah ari lebuh maya iya agi gawa kelia.
Kelimpah ari elawin 100 Pound sebulan ke diberi perintah British ngagai iya kenyau ari taun 1963, apin lama ke udah iya bisi nerima elawin RM2,000 sebulan ari perintah.
Nembiak PRS arapka Awang ke mega penerima midul ari Queen Elizabeth II Diamond Jubilee Medal enggau Pingat Jasa Malaysia (PJM), diberi kelai ke besai agi laban ti udah berambunka nyawa ngetanka menua tu kelia.
Bit ke mega Ketuai Biro Pemadah enggau Publisiti Nembiak parti nya madah, Awang patut diberi gelar bukai baka ‘Pingat Gagah Berani’ (PGB) tauka ‘Sri Pahlawan Gagah Perkasa’ (SP) ketegal pemerani iya.
“Iya jarang dikangau ngulu pengerami ke bebesai, enda baka penerima PGB tauka SP bukai. Ketegal pemerani, perintah patut meri kelala mayuh agi ngagai iya. Awang, sebaka enggau bujang berani bukai, patut diberi gelar nya baka niang Temenggung Datuk Kanang Langkau,” pia ku iya madah ngagai ‘The Borneo Post’ kemari.
Kanang, penerima gelar SP enggau PGB, seiku bujang berani ke tebilang endar nama di menua tu. Peninggi gelar ‘George Cross’ (bela peninggi) enggau ‘Victoria Cross’, gelar soldadu ke pemadu tinggi ti diberi ngagai bujang berani ari menua Komanwel ke mega menua ti ari baruh pegai British.
Bit mega arapka perintah ulih nikika penyampau elawin ke diterima Awang ninting bulan.
“Dalam taun 1961, iya udah meri sebidang tanah pesaka ke diempu iya endur numbuhka sekula primari (SK) Nanga Skrang. Perintah patut malas pemanah enggau penyiru ke udah dikereja iya ke menua tu ,” pia ku iya.
Ku Bit baru, kaban Biro Nembiak Pampang Pemadah enggau Publisiti sehari tu deka nemuai ngagai Awang ba rumah panjai iya di Ulu Skrang seraya nyuaka bantu dikena ngelempungka tating belanja dikena iya nemuai ke London, laban bala penerima gelar ‘George Cross’ bisi dikangauka ngagai Buckingham Palace kena 20 Oktober tu.
Sepemulai iya ari nyin, presiden PRS Tan Sri Datuk Amar Dr James Masing, Ketuai Indu PRS ke mega Senator Datuk Doris Sophia Brodie enggau Ketuai Nembiak PRS Liwan Lagang merambu deka meri bujang berani Iban nya perais, beserimbai enggau pengerami makai lemai ngintu penumbuh parti nya ke-10 taun, kena 26 Oktober tu.
Ku Bit, Awang udah diberi midul ‘George Cross’ ketegal pemerani iya ke digazet ba London kena 20 November, taun 1951.
Ku Bit, nitihka gazet nya, Awang udah dipinta masuk ngagai Platun 10, Kompeni “D”, 1 Batallion Rejimen Worcestershire di Malaya ke alai unit pematau kampung udah minta sida nyerang 50 iku raban kominis di Johor. Dua iku kaban platun nya, ketuai pematau enggau seksyen komander udah parai, tang Awang bakal ba pah. Taja pan bakal, iya mujur nyelamatka Pvt G Hughes.
Taja pan Awang bakal sereta ngenatka pemedis ba sebelah jari kanan, tang iya tetap malas timbak ari bala kominis. Lebuh sida ke udah dikelingi kominis, Awang lalu nyabut tuil grenade ngena jari kiba sereta malas serang ari komisi nya. Pengudah urung 40 minit belaban enggau bala kominis, sida lalu nyurutka diri.