SIBU: Opis Menteri Pengatur Pemayuh Pengereja Pengawa nengah Opis Pengereja Pengawa Sibu deka ngatur Program Penempatan Pekerjaan AZAM Kerja 2014 kena 18 Oktober tu ba Dataran Bandar Sibu Fasa II.
Nitihka penerang media ke diterima kemari, program nya deka belabuh dibuka berengkah ari pukul 9 pagi nyentuk ke 4 lemai.
Ba program tu bisi 40 iti kaunter dibuka alai bala mayuh ke bisi datai tau betanya senentang pengawa puang.
Sekeda ari kaunter tu iya nya Kaunter Khidmat Nasihat Perburuhan, Kaunter Azam Kerja, Kaunter Jobsmalaysia enggau Kaunter Temuduga Terbuka.
Mensia mayuh, orang ke ngiga pengawa enggau raban pengaji ti deka nemu enggau silik senentang undang-undang orang gawa tau betanya ba Kaunter Khidmat Nasihat Perburuhan.
Kaunter Jobsmalaysia deka meri lalau ngagai sida ke deka ngiga pengawa perintah nyengkaum pengawa ngerijister nengah ‘online’ nengah portal Jobsmalaysia.
Kaunter Azam Kereja tau alai mensia mayuh meresa nama sida bisi ke endang dilis ba Ekasih ke tau nerima bantu ari Jabatan Kerja Sarawak nengah Program AZAM Kerja.
Ba Kaunter Temuduga Terbuka, orang ke ngiga kereja enggau raban pengaji ulih ngaga intibiu enggau chara ‘Walk-In’ sepemanjai program tu diatur.
Naka ke diatu, udah bisi 25 iti kompeni nganjung nama ngambi bagi ba program nya ba tuju deka ngiga pengereja pengawa ba kompeni sida.
Komiti pengatur mega bisi madah, naka ke diatu udah bisi lebih 1,200 awak puang gawa ba macham bengkah pengawa puang maya nya ila.
Berindik ari pekara nya, semua raban graduate, nembiak ke udah badu sekula enggau mensia mayuh dipinta anang muai awak ngulu program tu.
Sida mega dipinta ngena ngepan ke engkeman kelimpah mai semua setipikit sekula enggau salin setipikit ke bekaul ke bukai.
Penerang silik tau ditanya ngagai Muhd Azrizam Osman, Syed Jamaludin Syed Aripin tauka Salfarina Han di Pejabat Tenaga Kerja Sibu nengah lumur 084-330700.