Dikarang Jacqueline David
KUCHING: Malaysia patut ngemetulka kuing penemu, anang nguna penemu ti kelalu ekstrim, penemu ti madahka menua tu ngembuan pengalus runding nyau baka ke enda amat, ku Menteri Pemansang Tanah Datuk Amar Tan Sri Dr James Masing.
Masing madah munyi nya lebuh dipinta mansutka penemu nimbal jaku ke dibantaika Menteri ba Opis Menteri Besai (PM), Nancy Shukri ke nyebut perintah enda ngelempaika ukum ba presiden Perkasa Datuk Ibrahim Ali berindik ari iya ti meransang peranak menua di semenanjung din nunu Bup Kudus ti ditulis dalam Bahasa Malaysia, laban iya ke nyebut munyi nya ukai ngenakutka bansa bukai ngembuan pengarap tang semina dikena nyeliahka sensitiviti sereta nerabai peranak menua ti bepengarap Islam.
“Reti nya utai ke dipadah munyi tu: ‘Nyeliahka sensitiviti sida ke bepengarap Islam; enti baka nya semua utai tau sengapa dipansut pia?’
“Berindik ari nya, aku ngasaika perintah sereta YB Nancy bulih penguntung ari mansutka penemu ti nadai bebatang ti ngujungka Ibrahim Ali enda ditinggang ukum taja pan penemu ti dipansutka iya bisi ensiban ba orang tauka pengarap bukai laban penemu presiden Perkasa nya nerabai seraya negika pengarap Islam…. besai amat reti penemu nya!
“Runding ti baka nya enda penetap ti ngumbai Malaysia tu ngembuan penemu tengah hari. Menteri Besai kitai baru udah nyebut maya Aum Gerempung Penyerakup Bansa (UN) dua minggu ke udah ke alai iya empu (PM) madah, Malaysia tu menua ke ngembuan penemu tengah hari, mungkur sereta ngelindung semua jalai pengarap.
“Nya alai, aku berunding kini penunga kuing Malaysia enggau penemu ti munyi nya (ari perintah),” ku Masing nyebut nengah surat kabar ‘The Borneo Post’ ba opis iya di Bangunan Baitulmakmur minggu nyin tadi.
Taja pia, Masing madah, iya lantang ati laban Sarawak ti betuaika Kepala Menteri Datuk Patinggi Tan Sri Adenan Satem enggau ex-Kepala Menteri ke dulu suba, Tun Pehin Sri Abdul Taib Mahmud enda nyangkung ulah tauka penemu ti ‘ekstrim’ betelesak di nengeri Sarawak.
“Bepelasarka penegap penemu perintah nengeri Sarawak, aku gaga ati laban ngelama tu, kitai enda kala betapi enggau penyarut ketegal pengarap di nengeri tu.
“Bepun ari nya, aku meri besai terima kasih ngagai perintah nengeri Sarawak laban ulih nyeliahka penyarut baka tu nyadi di Malaysia diatu.
“Kitai meri besai terima kasih ngagai Kepala Menteri sereta ex-Kepala Menteri ke suba ketegal tegap penemu mantah raban ekstrimis,” ku Masing.
Lebuh ditanya pasal pilih jalai pengarap, Masing madah, nya peneka seseiku, ni ke dipilih diri.
“Kitai enda ulih mejal orang nerima jalai pengarap ke ukai dipilih sida. Tambah mega ba aku, pengawa milih pengarap bisi dua reti… baka pintu rumah, enti kitai ulih masuk, ulih mih kitai pansut. Nya reti leka jaku milih pengarap nitihka peneka ati diri.
“Ambika chunto, pun, nuan endang orang Keristin, udah nya nuan empu nukar pengarap, masuk pengarap bukai, nadai orang ulih nagang kitai,” ku iya.
Masing ngarapka ketuai tauka pemesai di Malaysia belajar nerima jaku bantah enggau runding sereta penemu tebuka laban nadai seiku pan kitai patut mantaika penyumbung penemu diri.
“Kmega patut nemu nyeremin diri laban kitai enda ulih nyeliahka semua penyalah, nya alai buka runding lebuh orang bukai ngemetulka pengilap kitai,” ku Masing.
Masing ti mega presiden PRS madah, penemu ti nyebut, ‘nerabai tauka negika pengudus pengarap Islam’ nya panjung ke sebaka dikena ‘Jihadist’ ngetanka pengudus pengarap sida.
“Kitai enda ulih ngelakka penyarut baka tu nyadi ditu. Ngelama tu, Malaysia chukup likun, nya alai anang meransang penemu ti melunggang pematut di menua kitai,” ku iya.
Masing madah munyi tu lebuh nimbal penerang ari Nancy ke bepanggai ba ripot polis ke madah, presiden Perkasa nya semina ‘nerabai sereta ngetanka pengudus pengarap Islam’ maya nerangka pemutus Perintah enda ngukum Ibrahim Ali.
Ba penerang Nancy di Dewan Rakyat kena Hari tiga nyin tadi lebuh nyaut kaban parlimen (MP-DAP) sitak BaganLim Guan Eng, bepelasarka pansik polis, penemu Ibrahim nya dituju ngagai sekeda orang ke diperitaka bisi nyadungka Bup Kudus ke ngundan leka jaku ‘Allah Taala’ ngagai nembiak sekula, nyengkaum nembiak Melayu di Sekula Sekondari (SMK) Jelutong, Penang. Ibrahim bisi mansutka penemu nya pun bulan Januari taun tu.