KE PENGINGAT: Mawan (duduk tengah) begulai enggau kaban Kaunsil Koperasi Pesereta Felcra kandang menua Saratok Berhad.
KUCHING: Menteri Pemansang Rama Sri William Mawan madahka diri lantang ati ke pemansang Koperasi Pesereta Felcra Saratok Berhad (PFSB).
Koperasi nya bisi teulihka untung beresi 68 peratus, RM116,400 dalam taun 2012 manggai ba RM170,045 dalam taun 2013 ketegal pengelandik ngatur belanja sereta pemanah kaul enggau ketuai Felcra Berhad, ku iya.
Seraya madahka penyampau nya berengkah dikira bepelasarka statistik ujung taun pengulih koperasi nya kena 31 Disember 2013, Mawan muji Chairman Koperasi nya, Morni alias Ismuni Othman laban udah bejalaika pengawa enggau manah.
“Nengah penguntung nya bala kaban koperasi deka diberi 10 peratus ari penguntung dalam taun 2013,” pia ku Mawan ke mega MP Saratok MP lebuh ke bejaku ba aum besai (AGM) ninting taun Koperasi nya di Saratok kena ujung minggu tu tadi.
Koperasi nya teulihka pemujur ke manah amat pengudah nerima konterik sereta penguntung RM933,380 kena bulan September 2014.
Penguntung ke diulih koperasi nya taun tu dipelabaka nambah lalu sida nagit bulih untung RM2 juta.
Taja pan baru ditumbuh empat taun, tang koperasi nya bisi bangunan dua ringkat kediri empu pengudah nginjau duit ari Kaunsil Koperasi Malaysia (SKM).
Semua koperasi ke ari baruh kemata Felcra Berhad diperansang nguji bejalaika dagang nyengkaum ke bisi kaul enggau stesyen minyak, nyadung diesel enggau gis, dagang ngangkut sawit, meli sereta muka tanah baru ke ladang sawit, nupi jelu, sarang burung lelayang, nyadi francais ba barang pemakai enggau telekomunikasyen tauka eksesori telefon binching.