KUALA LUMPUR: Penyampau tugung getah dunya dipelabaka manggai 600 juta tan metrik dalam 2012 ngujungka rega komoditi nya mengkang diasai nyentuk ke sehari tu.
Menteri Kebun Dandang Besai enggau Komoditi Datuk Seri Douglas Uggah Embas madah, penanggul nya majak mar ditapi lebuh penyampau stuk getah manggai ba 300 juta tan metrik taun seiti nyin tadi.
Ku iya, pemar betapi enggau rega getah ke nurun nya ukai semina diasaika ba Malaysia aja, tang menua pemansut besai getah bukai nyengkaum Thailand, Indonesia enggau Vietnam.
“Lebuh aku ke baum enggau Menteri Komoditi Thailand apin lama ke udah,aku dipadahka iya menua sida bisi stuk getah 200 juta tan metrik.
“Kami sekali agi deka baum minggu baru di Kuala Lumpur berandauka chara nyaga pemansut getah sereta nentuka bekal getah ba palan pemansut ulih dikemata ungkup jemah ila,” pia ku iya madah ba sesi tanya saut ba aum Dewan Rakyat ditu ensanus.
Iya madah munyi tu lebuh ke nyaut tanya tambah Datuk Othman Aziz (BN-Jerlun) ke deka nemu strategi ngenetapka rega getah dikena ngenegapka rega komoditi nya di menua tu.
Ku Uggah, endang bisi penyerekang penemu ba rega getah ti ditetapka ba tikas global, tang Kaunsil Getah Malaysia (LGM) enda tau enda nitihka nya laban menua bukai pan sama bela baka nya magang.
“Dikena ngelempungka tating pengidup pekebun mit, Kabinet udah ngemendarka ungkup belanja RM6.4 juta ngambika bisi dikena 24 buah koperasi meeli getah dikena nyeliahka sida nyual ngagai orang tengah.
“Rega ari koperasi nya nitih ti udah ditetapka LGM, iya nya tinggi agi entara 20 nyentuk ke 30 sen enti dibanding enggau ke di luar lalu semua nya dibayar ngena mata duit magang,” ku iya. — Bernama