PUTRAJAYA: Kot Apil empai lama udah ngemendarka Gerija Sidang Injil Borneo (SIB) tauka Borneo Evangelical Church ngenataika peminta akim meresa baru bekaul enggau hak nguna leka jaku ‘Allah’ dalam semua utai ke dichelak bekaul enggau jalai pengarap nya.
Panel akim tiga iku ti betuaika Akim Datuk Rohana Yusuf sepenemu ngemendarka apil ari gerija nya ngemajakka prosiding peminta akim meresa baru ba Kot Tinggi.
Iya ngemutuska gerija nya teisika peminta ti ngujungka sida dikemendar sentang enggau pekara nya.
Akim Rohana ke baum enggau Akim Datuk Tengku Maimun Tuan Mat sereta Hakim Datuk Abang Iskandar Abang Hashim nyeliahka pemutus Kot Tinggi ke enda nerima peminta ari gerija ti minta pemendar nya.
Iya netapka 16 Oktober endur nyebut baru pekara nya ba Kot Tinggi.
Berindik ari pemutus nya, pekara nya ditikalka baru ngagai Kot Tinggi ngambika meri peminta akim meresa sereta ningaka peminta gerija nya ba 12 pekara, nyengkaum hak gerija enggau raban ke ngemeranka jalai pengarap nya ke ngena jaku Bahasa Malaysia tau ngena leka jaku ‘Allah’ dalam Bub Kudus ke disalin ke dalam Bahasa Malaysia enggau Bahasa Indonesia, semua utai ke dichelak enggau utai bacha bukai ba jalai pengarap nya.
Gerija mega minta sida dikemendar ngimport bup jalai pengarap Kristin ke ngundan leka jaku ‘Allah’, enggau hak gerija nya sereta raban ke merap jalai pengarap nya ngemeranka jalai pengarap sida.
Iya mega minta pemutus perintah ke ngelara ngena empat igi leka jaku baka ‘Allah’, ‘Baitullah’, ‘Solat’ enggau ‘Kaabah’ salah ba tisi undang-undang.
Dalam pemutus nya, Akim Rohana madahka pemutus Kot dalam kes nyelak utai bacha ninting minggu Katolik ‘The Herald’ enda agi nekul Akim Kot Tinggi mendingka kes gerija SIB.
Ku iya, Kot Besai udah mendingka kes nya lalu ngemutuska,pemutus Kot Apil ti madahka leka jaku ‘Allah’ ukai batang pekara dalam jalai pengarap Kristin, sereta dianggap ‘obiter’.
Kena 5 Mei taun tu, Akim Kot Tinggi Datuk Zaleha Yusof enda nerima peminta gerija SIB ngambi ngemendarka akim meresa baru sereta madahka Kot Tinggi terikat enggau pemutus Kot Apil, iya nya leka jaku ‘Allah’ ukai batang pekara dalam jalai pengarap Kristin.
Akim Rohana mega madah, pengawa gerija SIB ke minta akim meresa baru nya isu ke berat taja pan gerija udah matak peminta sida ngambika perintah certiorari sereta mandamus mulaika baru bup jalai pengarap nembiak mit sida ke ngembuan leka jaku ‘Allah’, ti dikena ba pelajar jalai pengarap di gerija nya.
Bup nya dirampas opis Menteri Dalam Nengeri kena 15 Ogos, 2007 tang udah dipulaika ngagai gerija kena 25 Januari, 2008.
Gerija nya enggau presiden iya Reverend Jerry W.A. Dusing alias Jerry W. Patel, udah memfailka peminta ngambika akim dikemendar meresa baru kes nya ke bekaul enggau opis Menteri Dalam Nengeri enggau perintah kena 10 Disember, 2007.
Dulu ari nya, luyar Lim Heng Seng madahka pemutus Opis Menteri Dalam Nengeri mungkur dua bengkah pekara, keterubah iya nya pemutus ke spesifik nagang pengawa ngimport bup jalai pengarap nembiak mit lalu kedua iya nya pemutus nagang nyelak semua utai bukai ke bisi nguna empat leka jaku ke dikena dalam jalai pengarap Islam baka ‘Allah’, ’Baitullah’, ‘Solat’ enggau ‘Kaabah’.
Ku iya, pengawa ngerampas bup nya dipejalai pengudah perintah dikeluarka opis menteri nya kena taun 1986, ke ngelara nguna empat igi leka jaku nya dichelak dalam utai bacha ke ukai Islam.
Ku Lim, ke bendar pemutus Opis Menteri Dalam Nengeri ke ngelara ngena leka jaku ‘Allah’ udah ngenusahka gerija nya, ke alai sida bisi hak ngenataika peminta ba pekara nya.
Luyar Kanan Persekutuan Shamsul Bolhassan madah, laban raban gerija udah matak pulai peminta sida ungkup perintah certiorari sereta mandamus, peminta nya dikira angus ti ngujungka kes nya nadai agi.
Lebuh ke dikerandau ba luar kot, Dusing madahka iya berasai lantang ati enggau pemendar nya, sereta beguna timpuh ke lama seraya madahka gerija semina dekaka pekara nya diputar nengah chara ke lurus. — Bernama