KUCHING: ‘ECO Smart LED Lamp’ ke digaga seiku nembiak ari Sri Aman, Brenand Grang Lenin Ngumbang, 21, udah dipilih nyadi projek ke pemadu manah entara semua ungkup projek ke penudi endar semester Jun 2014 beserimbai enggau Festival Inovasyen sereta PROJECT display JUNE 2014, Politeknik Kuching.
Nengah pemujur nya, Brenand nerima perais mata duit RM800 ke disuaka Menteri Pengintu Pengelantang Orang Indu enggau Pemansang Ruang Bilik, Datuk Fatimah Abdullah lebuh ti nutup festival nya, kilah ensana.
Brenand ke ngambi Diploma kos Electrical Engineering di Politeknik Kuching lebuh ke dikerandau pengarang berita madah, iya berasai temegah endar ati laban projek ke digaga iya ngena ungkus kurang ari RM250 nya udah diaku nyadi projek ke pemadu inovatif.
“Terima kasih ngagai supervisor aku, Ahmad Farid enggau bala pangan bukai ti udah nyaup aku ngemujurka projek aku tu,” ku iya.
Ku Brenand, penalam pengerindu iya ba solar udah nyadika peransang iya ngaga Eco Smart LED Lamp.
“Eco Smart LED Lamp tu ulih nyidi penampak ari matapanas enggau manah sereta mega ulih ngechas bateri ti bekuasa 12 volt,” ku iya seraya madahka diri ngambi penerang tambah pasal kuasa solar ari Internet.
Eco Smart LED Lamp digaga kena masang sereta madamka lampu sechara automatik seraya nguna kuasa elektrikal ngumpul kuasa penampak nengah panel solar.
“Projek tu mega bisi nguna litar sensor solar dikena mutarka panel solar nitihka kuing matapanas dikena ngumpul kuasa penampak ke pemadu mayuh ngambika ulih dikena ngechas bateri,” ku iya.
Berebak enggau nya, pemenang kedua enggau ketiga diberi ngagai projek ‘Gingerized UCO B100 Mini Plant sereta projek aplikasi mudah alih e-Cab’.
Projek Gingerized UCO B100 Mini Plant nya sentang ‘design, fabrikasi enggau pentauliahan loji mini’ dikena ngasilka biodiesel nengah minyak makai ke udah dikena.
Projek e-Cab sebengkah aplikasyen Android dikena nyidi semua penumpang enggau orang ke deriba teksi ba kandang bandaraya Kuching, ke alai penumpang enda ibuh nganti ke lalu lama tau pedis deka ngulih servis teksi.
‘Projek Gingerized UCO B100 Mini Plant’ nerima perais mata duit RM500 lalu projek e-Cab nerima RM300.