LUNDU: Seraban 398 iku orang ari 38 buah genturung pendiau ngelingi pelilih mit Lundu nerima dagin korban rambau Majlis Ibadah Qurban Renggat Nengeri Sarawak ke diatur di Masjid Darul Ibadah Kampung Sampadi, Lundu kemari.
Kepala Menteri (KM) Datuk Patinggi Tan Sri Adenan Satem enggau bini Datin Patinggi Dato Jamilah Anu datai ngemujur pengawa ngagihka dagin nya ke alai 11 iku capi disemelih sehari nya.
Entara peranak genturung pendiau ke nerima dagin korban ba pengawa simbolik ke disua Adenan iya nya Kampung Sampadi, Stoh, Sg Cina, Sg Langgir, Kankar, Pasir Hulu, Jangkan, Selampit, Keranji, Raso 1, Sg Belian, Skambal Cina, Trusan Jaya Baru, Sebat Melayu, Temelan Dayak, Sedaing, Stunggang Melayu enggau Kampung Tembaga Melayu.
Tebal agi orang ke nerima dagin iya nya raban mualat, indai tunggal, raban orang ke nerima bantu ari Opis Pengintu Pengelantang Pendiau (JKM) ninting bulan enggau orang tuai.
Urung 1,000 iku orang ke diau ngelingi Kampung Sampadi datai ngerami pengawa nya kemari ke alai sida lalu dibai merarau begulai enggau Kepala Menteri.
Ba pengawa nya, Adenan melanja 10 iku chapi lalu seiku agi dipelanja Tuai Pemegai Menua (TYT) Tun Pehin Sri Abdul Taib Mahmud.
Bela datai Menteri ba Opis Kepala Menteri (Pekara Islam) Datuk Daud Abdul Rahman enggau Menteri Muda Tanggung Pengawa Raban Bansa Datuk Peter Nansian.