Dikarang Jacqueline David //
Dikena milih pengari maya TDC pun taun 2015, atur bekunsika tanggungpengawa deka ngenegapka sereta pemujurka parti
KUCHING: Dua puluh enam pampang United People’s Party (UPP) dipinta ngatur Aum Besai Setaun Sekali (AGM) renggat pampang parti bulan November tu sebedau ngepunka Aum Besai Pengari Deliget (TDC) ti deka diatur kena 11 Januari 2015 tu ila.
Chairman Komiti Pemungkal UPP Dato Sri Wong Soon Koh madah, AGM pampang parti di serata menua patut diatur ba renggat pampang ngambika ulih milih pengereja pengawa opis sereta nyadi penyereta maya TDC taun baru tu ila.
“Di serata nengeri tu, semua pampang patut dipenyadi enggau menuku dalam kandang bulan November, iya nya 1- 30 November. Komiti patut ngatur aum pengari pampang diri ngambika ulih milih komiti pampang sereta sida ke dianjung ngagai TDC nya ila,” ku Wong.
Iya madah munyi nya maya aum media pengudah bejadika Indu Opis UPP di Jalai Pending ditu, kemari, ke sama digulu lebih 1,000 kaban parti ari 26 buah pampang ari serata Sarawak nyengkaum pemesai UPP bukai, Kaban Kaunsil Nengeri (ADUN) Bengoh Datuk Dr. Jerip Susil, ADUN Engkilili Dr Johnical Rayong anak Ngipa enggau ADUN Opar Ranum anak Mina.
UPP, sebengkah parti baru ke nyadi kaling Barisan Nasional (BN) dikemendarka Opis Pengerijista Gerempung (RoS) kena 14 Julai tu tadi, lalu naka ke diatu pemayuh kaban parti nya, nyangka udah ngelui 10,000 iku.
“Kami agi ngiga sereta ngerijista kaban parti baru, naka kediatu endang udah mayuh. Tau tanya ngagai tiap ADUN kami ke ditu pemayuh kaban ba sitak sida iya empu. Ambika chunto di Engkilili, bisi 3,000 kaban lalu dijangka deka nambah enda lama agi nyentuk 5,000 iku.
“Baka nya mega di Bawang Asan, kaban UPP ari Bumiputera aja bisi 3,000, enda nyengkaum kaban parti bansa China. Kami nyangka ulih nyapai 8,000 iku kaban parti.
“Bengoh diatu udah bisi 4,000 iku kaban lalu di Opar, enda mayuh laban penyampau mensia dia endang mimit,” ku iya.
Taja pia, Wong ke mega Menteri Kanan sereta Menteri Nguasa Opis Kandang Menua enggau Pemansang Komuniti madah, UPP ngemeratka bala nembiak nyengkaum sida ke bukai maya ba parti lama (SUPP) enda diberi peluang ngaul politik lalu mayuh ari sida tu deka masuk kami (UPP) lebih agi raban profesyenal, ku iya.
“Kami ngemeratka rebak baru laban sida ke tuai agi udah meda pemansang di Sarawak kelimpah ari udah ngasaika peneleba sereta mayuh macham penanggul ke ditapi sida udah teleba enggau gaya politik BN.
“Tang rebak rabu ke udah chukup umur, mansang ba pengidup ngembuan pengagit sereta ransing deka ngerembaika penemu sida lebuh ke agi biak patut diberi peluang,” ku iya.
Bepelasarka semua nya, ku Wong, UPP matut ngiga jalai matak raban sida tu seraya ngiga ketuai ngambika bisi ngiring raban ke serebak enggau sida nengah pengelandik ngena Teknologi Pemadah (IT), Internet sereta perengka penyambung bukai.
“Kitai nadai ngena chara lama berandau enggau rebak baru. Kitai nengah dunya siber, media pengawa rama, enggau chara penyambung moden. Kitai patut beratika pekara tu ngambika bala nembiak ransing begulai enggau BN jemah ila,” ku iya.
Naka ke diatu, gaya timbal ari nembiak ku Wong, chukup manah lebuh beratika pemayuh nembiak ke ngulu pengawa bejadika opis baru UPP.
“Seharitu, kitai bejadika Indu Opis UPP baru lalu nya ngelaika pemun ungkup kitai semua. Tu meh pemungkal iya, kitai deka niti jalai ke baru, jalai ke mai kitai bekunsika mayuh agi tanggungpengawa.
“Kitai deka niti jalai UPP, sebengkah jalai ke ngembuan mayuh tanggungpengawa, tambah mega ukai jalai ke muntang tang tau nyadi muntang laban kitai bekunsika tanggungpengawa taja berat. Pejalai tu agi jauh tang nengah pemerani sereta penegap penemu diri, kitai ulih tejapaika pemujur,” ku iya.
Di Kuching, pampang UPP mungkur sitak Padungan, Batu Lintang, Pending, Batu Kawah enggau Kota Sentosa. Lalu, sitak luar ari Kuching mungkur pampang di Sibu, Bawang Assan, Pelawan, Dudong enggau Bukit Assek. Di Miri, Piasau, Senadin, Pujut enggau Bekenu. Lalu ba endur bukai, Bengoh, Engkilili, Opar, Meradong, Sarikei, Kanowit Bintulu, Marudi, Limbang enggau Lawas.
Sama bisi nguluka atur pengawa nya kemari, luyar George Law, Temenggong Lu Kim Yong, Stephen Lau enggau Dr Chou Chii Ming.