Dikarang Judan Bungap //
Sida ukai baka perintah BN ke seruran berundingka chara dikena nyungkak tikas pengidup rayat
SIBU: Perintah Barisan Nasional (BN) semampai chakah berundingka chara dikena nyungkak tikas pengidup rayat ngambika rebak dudi ila ulih ngasaika penyenang enggau pengelantang.
Menteri Muda ba Opis Kepala Menteri (Adat Bansa Penan enggau Bumiputera) John Sikie Tayai madah, tuju perintah BN agi ngetanka kuasa ngambika ulih ngemansangka menua ngembing rayat bepenatai pemisi ti tinggi manggai taun 2020.
“Tu bida ke besai bisi dipeda ba perintah BN enggau penyakal ti semina nguji ngemuntan perambu program digaga BN ke mai penguntung ngagai rayat.
“Ninting maya perintah BN deka ngaga tauka mantu pekara bekaul enggau pengidup rayat, bisi orang datai ari sukut politik nguji ngemuntanka program tauka projek kitai,” pia ku iya madah.
Iya mantaika jaku nya maya Program Pemesai Begulai Enggau Rayat ba Rumah Mulok Das, Bukit Dinding Selangau/Mukah, empai lama ke udah.
Menteri Muda Kaunsil Kandang Menua nya mega madah, BN ti betuaika Menteri Besai Datuk Seri Najib Tun Razak enggau Kepala Menteri Tan Sri Adenan Satem udah naka alah mai pemansang ungkup genap iku rayat menua tu.
Iya madah, pengawa penyakal ngemuntanka perambu pemansang perintah BN enda patut nyadi laban tuju perintah endang deka mai pemanah enggau meri penguntung ngagai rayat.
John Sikie madah, perintah BN perintah ke pemadu mentas ngagai rayat enti dibida enggau penyakal ke semina manis di mulut nyadung semaya ngagai rayat.
Berindik ari pekara tu, iya minta semua tuai raban bansa nyengkaum Komiti Pengintu Pengelikun Genturung Pendiau enggau Tuai Rumah besaup nyadi jematan perintah enggau rayat.
“Tu ngambika penanggul ke bisi nuntung rayat lebih agi ba rumah panjai ulih diputar nengah chara ti patut,” pia ku iya madah baru.