MARUDI: Seiku indu bansa Kayan, Mujan Lah 42 taun mujur dichiri nyadi “Tokoh Wanita” sitak Menua Baram beserimbai enggau program “State Women Day” ke diatur ba renggat pelilih mit menua Marudi empai lama ke udah.
Mujan seiku peranak menua Long Bemang ngembuan empat iku anak sereta chukup regas ba pengawa politik enggau pengawa mantu rayat.
Kelimpah ari nya, Mujan mega ngembuan lisin PKK,UPK, CIDB enggau FFO sereta udah numbuhka sebengkah kompeni kenyau ari taun 1996 nyentuk diatu.
Ba pemujur bukai, Mujan udah kala dichiri anugerah pemujur pengawa dagang Orang Ulu sereta dirikod seiku ari raban orang indu ke mujur dalam pengawa dagang ba ‘Sarawak Women Business’ taun 2013.
Nangkanka nya, Mujan mega seiku ari tukang wang Komiti Pemansang Orang Indu, Raban Komiti PDK Eda Beran Long Laput, Tukang Wang Komiti Pengintu Pengelantang Telang Usan.
Kelimpah ari nya, iya mega dipadu nyadi Tuai PBB Ranting Nibong kenyau ari taun 2004 sereta diberi tanggungpengawa nyadi ECC PPB Telang Usan. Iya mega seiku Tukang Wang SABERKAS 2013 – 2015 Telang Usan.
Beserimbai enggau program nya, sebengkah atur pengawa ke dikumbai “Mothers Queen Competition (Ibu Anggun)” mega bisi diatur.
Seiku indai orang ke beumur 47 taun Hii Mee Ping mujur nyadi champian ngulihka juluk “Mothers Queen” sereta Hii Loh King bulih lumur dua sereta ditangkanka Santie Avit, lumur tiga.
Urung 15 iku raban penyereta bisi ngambi bagi ba program “Beautiful Mother’s Contest” ke diatur beserimbai enggau program nya.
Program nya dipenyadika Kaban Parlimen (MP) Baram, Anyi Ngau.
Anyi mega madah, raban indu di menua nya chukup besai guna dalam mantu perintah ngenataika pemansang ngagai rayat di menua nya.
“Raban indu ngembuantanggung pengawa ke chukup berat.
Sebengkah ari tanggungpengawa ke chukup berat dipangku raban indu kelebih agi sida ke udah bisi anak iya nya pemerinsa ngidup enggau nyaga anak nyadi mensia ke beguna,” Ku iya.
Anyi mega meri jaku lalau awakka rayat enda sesekali bejai tauka mantah raban indu madahka sida lemi ari raban lelaki. Pia mega ngagai sida lelaki ke udah bisi bini, anang sesekali mantah indai sida. Ulah ke enda ibuhka apai indai ukai ulah ke menyana laban raban indu lebih mayuh guna enti dibandingka enggau raban lelaki.
“Raban indu ngembuan pengeransing ke chukup badas sereta ulih ngemanahka tikas ekonomi sida. Tu tampak nunjukka raban indu chukup besai guna ngagai kitai mensia,” ku iya.
Sama bisi ngulu program nya, D.O Pelilih Menua Marudi Mackos Sibong, Ketuai Raban Bansa Kayan Temenggong Elizabeth Deng, Pemanca Chong Chin Hui sereta Sekretari Opis Pelilih Mit Menua Marudi (MDC) Petrick LinggiTaboh.