SRI AMAN: Perintah deka meda genap serak raban bansa nyengkaum gerempung enggau serakup begempung dipinta besaup pengawa enggau pangan diri dalam nempa penyerakup kaul.
Nya alai, mina nengah penyerakup sereta kerejasama ulih ngemujurka semua perambu ke dikena dipejalai dikena nyapai juluk pemansang, ku Sapit Speaker Kaunsil Menua Senator Datuk Doris Sophia Brodie.
Iya madah, ba juluk kitai nyapai pemujur pemansang ke lebih manah, kitai patut besaup sereta ngembuan penemu ke belembut enggau pangan diri anang bekira tikas umur.
“Perintah ku iya, hari seiti ke hari seiti merambu mayuh bengkah program awakka diasaika rayat ngambika sida ulih idup lantang senang kelimpah muka mayuh pengawa puang ngambika diisi,” ku iya.
Iya madah munyi nya rambau Pengerami Merarau diatur Chapel Saint Peter, Batu Lintang Undop ditu empai lama ke udah.
Nya alai, ku iya dalam juluk ngulihka peluang nya, rayat patut nguna mayuh bengka chara baka nengah internet enggau surat kabar.
“Kitai patut ngembuan runding ke tebuka lalu patut landik nguna Teknologi Pemadah (IT),” ku iya.
Nangkan ke nya, iya madah dunya ke maya hari tu majak moden lalu begunaka orang ti landik dalam penemu Teknologi Pemadah enggau Penyambung (ICT).
Nya alai, dikena ngerebut peluang nya, runding rayat patut berubah setipak enggau peneka ke maya hari.
Doris berebak enggau nya madah, taja pan dunya diatu majak moden, iya ngarapka nadai agi bala nembiak tauka penguna internet salah guna laman media rama baka facebook, twiter enggau utai bukai ngereja pengawa ke nadai meri penguntung.
Laban perengka nya ulih dikena ngereja pengawa ke tau meri penguntung baka nambahka penatai pemisi penguna empu, ku iya.
Berebak enggau nya, Doris madah rayat patut meri terima kasih enggau semua asil ari perintah Barisan Nasional ti betuaika Menteri Besai Dato Seri Mohd Najib Tun Razak.
“Rayat patut ngetanka penyerakup engagu seruran nitihka ayu 1 Malaysia dalam juluk ngetanka pengelantang enggau penyenang rayat enggau menua,” ku iya.
Sama bisi datai iya nya Pemesai Khas Kaban Parlimen Sri Aman, Edmund Pirang, Ketuai Kaunsil Opis Pelilih Menua Sri Aman (MDSA), Richard Tawan Sedu, Pengulu Micheal John Sanggop sereta bala bukai.