SIBU: Parti Sa’ati Rayat Sarawak (SUPP) enda mudah ngelengka 19 iti penuduk sida ba Kunsil Nengeri (DUN) ngagai parti baru ke ngelar diri kaling Barisan Nasional (BN).
Presiden SUPP Senator Profesor Datuk Dr Sim Kui Hian madah, parti baru nya kelalu mayuh bejaku bekaul enggau penuduk ti deka diambi sida ila.
“Anang kelalu mayuh jaku tang gawa bendar agi ungkup rayat, meri servis ke manah ngagai parti ukai ketegal pemesai parti,” pia ku iya madah.
Iya mantaika jaku nya maya Aum Besai Keterubah SUPP Pampang Dudong ditu, kilah ensana.
Ba aum nya, Datuk Dr Soon Choon Teck udah dipilih nyadi Chairman SUPP Pampang Dudong ba timpuh 2014-2017.
Ku Dr Sim madah, enti sesebengkah parti politik nya kelalu mayuh bejaku ari ngereja pengawa, parti nya enda tan lama.
Iya madah, SUPP Pampang Dudong udah diidupka baru enggau empat iti pampang ke bukai ba sitak tu dikena ngeringka agi parti.
“Sehari tu (ensana) singkang keterubah SUPP Pampang Dudong. Lima bengkah pampang ke bukai di Sibu udah ditetapka lalu enda dipegai SUPP Sibu tang pegai SUPP nengeri ti deka semampai numbuhka pampang ba nengeri tu ngambika ulih meri servis ngagai rayat,” ku iya madah.
Ku iya, penumbuh lima iti pampang SUPP di Sibu mai reti ke besai lalu sida meseti ngembuan kerejasama.
“Pampang meseti gawa ke rayat baikka rayat nya nurun ngundi tauka enda.
“Pengawa kitai meseti dikereja enggau ati ti lurus. Mata rayat bangat lansik, sida nemu ni bagi ke manah tauka enda,” pia ku iya.
Iya mega madah, Komiti Palan Parti SUPP nyukung penumbuh lima bengkah pampang di Sibu.
Kelimpah ari nya, Sim mega bisi nyebut ukai semina SUPP, pengelantang menua Malaysia jemah ila bepanggai ba rebak diatu.
Ku iya, sebagi ari rayat ba menua tu maya taun 2001 diuan nembiak ke berumur baru 15 taun tauka 32 peratus lalu 2011, 27 peratus.
“SUPP ngembuan pengelebih enti dibida enggau menua Jipun enggau Australia ti bisi mayuh agi rayat ke besai tuai laban pengelantang dudi hari menua bepanggai ba rebak baru diatu,” ku iya madah.
Berebak enggau tu mega, Dr Sim minta semua pampang parti bekerejasama enggau parti komponen BN ke bukai ba menua sida ngambika ulih nempa kaul ke manah sebedau mai penguntung ngagai rayat nengeri tu.