BINTULU: Bantu ke patut deka diberi ngagai waris niang Meling Mula ke sulai ba tragedi bilun MH17 iya nya Simbut Kedit, 39, enggau tiga iku anak iya Maryline Sindun, 18, Benedict Bana, 15 enggau Gabriel, 8, ku Menteri Kebun Dandang Besai enggau Komoditi Datuk Amar Douglas Uggah Embas.
Entara bantu ke deka diberi tu iya nya nyediaka rumah enggau belanja sekula.
Uggah ti mega nyadi Kaban Parlimen Betong, madah sida udah berunding enggau Opis Penginbtu Pengelantang Pendiau Raban Bansa (JKM) bekaul enggau chara baka ni deka mantu ruang bilik kelebih agi ari sukut pemeri rumah enggau belanja anak sekula ke endang diguna sida amat.
“Laban aku ke nyadi pengari rayat di Betong enggau kaban belayan sida naka ulih berundingka chara dikena mantu sida neruska pengidup baka ngulihka bantu rumah ke lebih manah pengudah ditinggalka niang apai sida,” ku iya.
Anak tuai niang, Maryline Sindun deka napi peresa Sijil Tinggi Persekolahan Malaysia (STPM) bulan November tu.
Iya madah munyi nya rambau dirandau pengudah tembu pengawa nguburka niang Meling Mula di Pendam BDA Batu 2 Jalai Sultan Iskandar pagi Hari Enam tu tadi.
“Aku ngarika sida niang Meling Mula sebilik deka meri terima kasih ngagai perintah Malaysia ke udah mujur mai pulai tubuh niang ke Malaysia lalu datai ditu (Bintulu) diberi adat basa ke chukup besai,” ku iya.
Iya madah, tu mandang Menteri Besai (Datuk Seri Najib Tun Abdul Razak) chukup siru ngagai waris sida ke bebadi ba bilun MH17.
Ku iya, penusah sigi enda ulih buai kitai ari pengingat laban kitai empu bisi meda baka gaya perintah udah mantu, sida (niang) sebilik chukup beterima kasih ngagai pengawa tu.
“Lalu aku mega deka meri terima kasih ngagai semua piak, taja pan kitai nunggu pengelama dua bulan tang pengujung iya datai mega (tubuh niang) lalu kitai nemu sekeda penanggul ke ditapi endur mai tubuh iya pulai ke Sarawak,” ku iya seraya madahka diri serumah enggau niang.
Niang Meling Mula endang peranak asal Rumah Panjai Wilson Begat Bekir, Penom, Ulu Paku Betong.