KANOWIT: Pelilih tu patut ngembuan produk dagang temuai ke ulih ngangkatka nama Kanowit dalam industri dagang temuai di nengeri tu.
Kaban Parlimen Kanowit Datuk Aaron Ago Dagang madah, enti bisi produk dagang temuai, nya deka meri pangka ke besai ngagai pengerembai ekonomi sereta pengidup rayat ba kandang menua tu.
Nya alai, nyau deka semua bagi menua tauka pelilih menua bukai di nengeri tu udah bisi ngembuan program enggau produk dagang temuai ke mendam nyadika program ninting taun ke diintu besai.
“Kanowit patut ngembuan program dagang temuai ke bisi dirintai dalam kalendar dagang temuai. Tu mantu nyungkak ekonomi mensia mayuh ba kandang menua tu enti udah bisi industri hotel, inap desa enggau utai bukai,” ku iya.
Iya madah munyi nya rambau bejadi Program Lumba Perau Sakai ke diatur Komuniti 1Malaysia (K1M) Pelilih Kanowit di Tebing Sungai Kanowit, empai lama ke udah.
Sama bisi datai Kaban Kunsil Nengeri (ADUN) Ngemah Alexander Vincent, Sekretari Politik Kepala Menteri Maurice Giri, Residen Menua Sibu Sim Kok Kee, Pemesai Pelilih Kanowit Katis Noel Nyabong, Pemesao Opis Pemadah Pelilih Kanowit Wan Mohd Zuki Wan Ismail, Chairman K1M Machan Pemancha Spencer Kudang enggau chairman komiti program Kaunselor Benjamin Angki Kaboy.
Nangkan ke nya, Aaron ngarapka program nya ulih diatur besai-besai sereta mungkur mayuh bengkah gerempung ukai perintah (NGO) sereta gerempung ke bukai ngambika ulih matak mayuh temuai datai.
Iya madah, pemujur ke ngatur Pesta Kanowit 2014 deka mengkan ditan lalu patut diatur baru taun baru.
“Baka ke udah disebut aku tumu tadi, Kanowit ulih nyadi seiti produk dagang temuai ninting taun. Pesta Kanowit 2014 ulih nyadi produk tau nyungkak ekonomi mensia mayuh diatu.
“Program baka tu patut dipajakka agi dikena ngerembaika agi industri dagang temuai Sarawak lebih agi pelilih Kanowit,” ku iya.
Iya madah, program tu mujur ngempurukak mensia mayuh enggau nempa penyerakup entara pupu bansa sekalika sida nya diau ba dalam tauka luar pelilih Kanowit.
“Berebak enggau nya mega, kitai patut ngetanka pengelantang menua tu. Enti kitai lantang, temuai pan nadai sanggu ati begulai enggau kitai ngemujurka pengawa sida.
Pengudah bejaku bejadi program nya, Aaron sereta bala pemesai ke bukai dibai bejalaika pengawa Nasih Ai dikena nyelaihka pekara ke enda disadang nyadi sepemanjai program nya.