Dikarang Jacqueline David //
NGEMATA: Taib (kiba) disempulang bini iya, Jabu enggau bala bukai benung ngemataka seiku nembiak ke baru deka belabuh welding.
PENGAWA betukang sereta ngembuan pengelandik teknikal diatu, ukai pengawa ti dikemaruh agi baka kelia, tang sida ke gawa betukang sereta bisi pengelandik teknikal ngembuan gaji ke besai agi ari gawa nyadi kerani.
Nya alai, nembiak sekula ke kurang landik dalam akademik diatu anang irau ati agi laban sida iya tau belajar penemu bukai baka dalam pekara teknikal.
Centre for Technical Excellence (CTE) bisi nyendiaka pelajar ti dikumbai ‘6G Welding’ ke ngelatih bala nembiak ‘Welding’ ngena perengkaguna moden 6G, ke alai nembiak ti ngembuan peneleba dalam pelajar tu, besai agi peluang ulih gawa ba industri minyak enggau gis tauka industri begagaka rumah, ti ngujungka deka dibayar gaji ke besai.
Ba kos pemungkal dalam bulan September tu tadi, CTE udah ngerijsta urung 25 iku nembiak, lalu raban tu enda lama agi deka nembuka pelajar. Tebal agi bala alai nembiak tu datai ari menua pesisir, Bintulu enggau Miri deka dilatih dalam kandang tiga (3) bulan.
Seiku ari ketuai pengajar program nya, ‘Advanced Welding Programme – Petronas (AWP-Petronas), Wan Mohd Shuimy madahka semua nembiak ti dilatih dalam program nya endang udah bisi peneleba ‘welding’ tauka udah ngambi Setipikit Pengelandik Malaysia (SKM) tikas II, nya baru sida ngerijista diri ba program AWP-Petronas.
“Bala nembiak ke udah tembu ngambi SKM II tau minta masuk CTE, enti sida udah tembu belajar ba sebarang palan pelajar pengelandik baka IKM, ILP, AWISA (sebuah sabsidiari PPKS) tauka palan pengelandik, sida tau ngerijista diri masuk program tu.
“Kos tu semina 3 bulan aja, udah nya sida iya deka bulih ‘6D Welding Certificate’ lalu nangkan nya sida iya ulih gawa ba sebarang endur ti di kedeka sida dalam industri minyak enggau gis (O&G) tauka industri ngaga rumah.
“Pekara ke beguna amat iya nya ngembuan pengelandik 6G, sida tetap laku laban peminta nya tinggi,” ku iya.
Iya madah munyi tu lebuh dikerandau pengarang berita, beserimbai enggau Tuai Pemegai Menua (TYT) Tun Pehin Sri Abdul Taib Mahmud bejadika palan CTE kena hari Tiga tu tadi di Jalai Santubong, Rampangi ditu.
Iya madah, peluang gawa dalam 6G Welding tu tinggi agi ari pengawa ‘welding’ bukai laban ‘6G Welding’ tu ngena skop ke besai agi sereta perengka guna ke moden dikena maya gawa, ke lebih agi dalam projek O&G.
Wan Mohd Shuimy madah, skop pelajar ti diajar dalam ‘6G Welding’ mayuh agi praktikal ari teori ke lebih agi bala nembiak diajar sentang pemun pengawa ‘welding’, nyendiaka perengka guna ti dikena, ngelala sekeda bansa paip ti dipasang (nitihka industri), chara ngetak paip nitihka sais enggau pemanjai sereta ngelala endur penuduk paip ti deka dilekat nitihka gaya ngena baka 1G, 2G nyentuk ke 6G.
“Ambika chunto, baka 1G nya patut dilekat ba penuduk (horizontal), penuduk ke pemadu muntang tang ke pemadu mar digaga iya nya penuduk 6G, ke alai paip ti dilekatka deka ba penuduk 45 (degrees).
“Nya alai, pengawa ‘welding’ ke lebih agi lebuh ngelekatka paip O&G tu pengawa ke silik, enda tau sebarang, laban bisi sukat ke patut dikena, endur iya mega enda tau enda betul,” ku iya.
Nambahka nya ku iya, baka pengawa ngelekatka paip dalam tasik, bansa paip ti dikena enda sebaka enggau di darat laban paip ti dikena enda tau enda di (coated) ngambika enda betegar.
Ke pengabis panjai diatu, sistem paip ti dikena urung 520 km ke mesai 22-36 inchi diameter, dikena nganjung minyak ari Kimanis ngagai Bintulu.
Nembiak ke ngambi kos tu diajar kualiti ‘welding’ ke betul, laban ba pengujung kos sida, tetiap iti utai ke diwelding’ nya deka diperesa inspektor ‘welding’ ke landik.
“Nya kebuah, nembiak ke belajar ‘6G Welding’, dalam peresa sida iya manggai tiga bulan,lalu orang ke meresa pengawa sida deka beratika chara sida iya ‘welding’ sereta meresa produk ke digaga sida ke dikumbai ‘Visual Inspection’ nyengkaum perengkaguna ti dikena sida enda tau enda betul.
“Ninting iti peresa ti digaga bala nembiak tu, sida enda tau enda pass laban enti sida iya enda mujur, rugi ngapa sida nandu baru kos nya baru dalam kandang tiga bulan baru.
“Nya alai, lebuh ke peresa, sida enda tau enda mujur ba ‘Visual’ enggau ‘Radiography’, ti dikumbai ‘Non-Destructive Examination’. Nya kebuah bala nembiak enda tau enda ngembuan latih ke chukup, ngambika seruran landik sereta nemu ngaga pengawa ti diasuh bala pengajar,” ku iya.
Taja pia, iya madahka peluang bala nembiak mujur ngambi kos tu tinggi, urung 95 nyentuk ke 100 peratus.
Kos ‘6G Welding’ dipelanja Petronas nyengkaum perengkaguna ke dikena nembiak belajar lebuh ke praktikal, baka miki injin ti dikena bala nembiak enti sema injin nya rusak, nyendiaka perengkaguna dikena nembiak belajar.
“Perengkaguna ke dikena raban pengajar ti ngajar ba CTE nya mega disediaka Petronas. Kelimpah ari nya sida ke ngajar program tu mega deka dilatih Petronas,” ku iya.
Bala pelatih tebal agi diajar nengah chara praktikal ari teori ngemeratka pengelikun enggau atur stindit ‘welding’ ke patut dititih sida.
Program tu dipejalai nitihka set stindit sereta ke diaku ASME (American Soceity Mechanical Engineers), ti mayuh nerangka sentang penuduk paip maya ke dilekat, sukat ke stindit, pemesai, sukut, awak sereta chara ‘welding’ ke betul.
“Ambika chunto, baka batang paip ke dipasang ungkup industri O&G, ti disambung ari Kimanis Sabah nyentuk ke Bintulu ti sepenyauh 550 km, semua nya ngena 6G. Batang paip minyak nya enda tau enda disambung sereta nitihka stindit paip ke patut.
“Sukat enda tau enda betul nitihka ‘Welding Procedure Spec’ (WPS) ke patut dikena, baka sais paip, penebal paip, bansa batang besi ke patut dikena sereta penyampau karan ke dikena, semua nya bisi set stindit kediri empu,” ku iya.
Bala nembiak ke lebih agi ari menua pesisir ti bisi ati deka masuk program tu tau nguji minta tama CTE, lalu maya masuk program tu bisi dibuka 3 kali setaun (Sept/Dis/Mac).
Belajar di CTE tu enda bebayar sereta elawin RM500 ti disediaka Yayasan Sarawak (YS).
Pengelandik teknikal tu majak dikemeratka di Sarawak laban menua tu majak nyingkang nuju nyadi menua industri manggai ba taun 2030 nengah SCORE, ke alai mayuh macham industri baka O&G, karan, pengawa berikan, sereta mayuh kilang entarabansa bukai deka dipejalaika ditu.
Puku ke udah diperanak ba SCORE dipelabaka bisi RM30 biliun, deka ngerembaika penumbuh industri sereta muka peluang gawa dalam bemacham pekara teknikal ke ditaga dalam 350,000 peluang pengawa puang ti begunaka pengereja pengawa ke landik.
CTE Sarawak ditengkebang TYT ke diatu, deka nyendia kos pengelandik teknikal sereta program nyungkak pengelandik ke bekaul enggau industri nengah sempekat ke digaga enggau Kompeni Peribit Besai (PPP).
Nitihka pansik entara 2016 nyentuk ke taun 2020, Sarawak deka betapi enggau pengurang pengereja pengawa ke pengelandik, iya nya urung 27,600 iku injinir mekanikal manggai 2020, enti menua Sarawak enda nyendiaka diri berengkah ari diatu, sereta semina ulih ngeluarka urung 3,150 iku teknisyen elektrik enggau elektronik aja.
Bepelasarka statistik nya, palan teknikal di Sarawak enda tau enda bebendar agi ngelatih urung 350,000 pengereja pengawa ke pengelandik dikena napi pengabis mimit, 50 peratus KPT manggai ba taun 2030 ngambika ulih nyapai juluk menua tu nyadi menua ke mansang.