Nya ngelaika pemanah atur ngemansangka menua ngelama tu
KUCHING: Pemujur Malaysia bulih penuduk lumur 20 ari 144 buah menua ba Laporan Daya Saing Global 2014-2015 ngujungka menua tu mengkang ba penuduk ke pemadu tinggi ba ekonomi menua mansang di Asia.
Kepala Menteri Datuk Patinggi Tan Sri Adenan Satem madah penuduk global sereta basa nya ngelaika Malaysia mujur nyadi indikator enggau parameter ba pemanah atur ngemansangka menua ngelama tu.
Iya ke pemadu beguna, pemujur nya ditempa nitihka idar dunya ke alai rayat maya diatu ukai orang ti begunaka servis ti pasif.
“Rayat diatu majak mansang sereta bepenau ke alai sida nagih servis ke engkeman kena ngemantupka pinta sida.
“Taja pan udah bejalaika pengawa enggau manah dalam timpuh 30 taun ke udah, pemar meri servis mengkang ditapi lalu ketegal nya kitai ke nyadi orang gawa perintah patut kreatif enggau inovatif,” ku iya.
Iya mansutka jaku nya maya bejadika Minggu Inovasi 2014 enggau Majlis Anugerah Konvensyen Kumpulan Inovatif & Kreatif (KIK) Perkhidmatan Awam Renggat Nengeri Sarawak 2014 ditu, malam ensanus.
Adenan netapka atur meri servis nitihka pinta rayat, deka nyadi pekara ti dikemerat ba sistem pemeri servis perintah maya ke diatu.
“Nyadi seiku orang gawa perintah, kitai dikearap ngarika perintah ba semua renggat baikka nya ba renggat pelilih menua tauka pelilih mit.
“Tanggungpengawa tu bekaul enggau pengarap ti diberi rayat ngambika kereja dipejalai enggau naka pemanah, integriti, penyiru meda pemar ke ditapi rayat sereta ngemat mutarka penanggul,” ku iya.
Dulu agi ari nya, raban D’RIGS (Majlis Bandaraya Miri) ungkup Kategori Ngatur Pengawa enggau Southern Thinkers (Majlis Bandaraya Kuching Selatan) ungkup Kategori Teknikal nerima gelar ke alai kededua tim nya mai pulai Trofi Kepala Menteri Sarawak.
D’RIGS ti ngaga projek ‘Sistem pemeriksaan premis makanan yang kurang efektif’ lalu Southern Thinkers ngaga ‘Kaedah dan proses membaja pokok yang masih konvensional di kawasan seliaan MBKS’, lalu enggau nya kededua tim nerima perais mata duit RM5,000 enggau setipikit.
Trofi Sekretari Perintah Nengeri Sarawak pulai ngagai Raban Aspirasi Utara ari Perbendaharaan Nengeri Bagi Miri (Ngtur Pengawa) sereta MEGA ari Opis Pengerara Api enggau Penyah Penusah (Bomba) Malaysia Nengeri Sarawak (Teknikal).
Ungkup Trofi Sekretari Perintah Besai Sarawak, pemenang Kategori Ngatur Pengawa pulai ngagai Accurate ari Opis Tanah enggau Penyukat Bagi Mukah sereta Benak 10 ari Opis Kereja Raya Sri Aman (Teknikal).
Opis Perbendaharaan Negeri Sarawak dipilih nerima gelar Anugerah Khas Juri.
Bela datai bini Kepala Menteri Datin Patinggi Datuk Jamilah Anu, Sekretari Perintah Nengeri, Tan Sri Datuk Amar Mohamad Morshidi Abdul Ghani enggau Sekretari Perintah Besai Sarawak, Datuk Md Yahaya Basimin.