Diatu sida udah mayuh bepelajar tinggi lalu sida deka meda utai ke lebih manah diajar ngagai anak sida
SERIAN: Menteri Pemansang Infrastruktur enggau Penyambung Dato Sri Michael Manyin Jawong ngelalau bala pengajar anang ngemaruhka apai indai nembiak ba menua pesisir nyema sida diengkah gawa ba menua pesisir pengudah tembu belajar.
Apai indai nembiak di menua pesisir diatu, ku iya udah mayuh bepelajar tinggi lalu sida mega nemu isu ke nyadi ke maya hari, nya alai sida deka meda utai ke lebih manah diajar bala pengajar ngagai anak sida.
Iya madah, apai indai nembiak di menua pesisir diatu deka meda pemutus akademik bala anak sida sebaka enggau nembiak sekula ba kandang mengeri.
“Ngelama tu utai ke disadang enggau dikedeka (apai indai nembiak di menua pesisir) mina ba tikas pugu. Tang diatu, pekara ke disadang enggau dikedeka nyau lebih kompleks, moden sereta makin tusah dijapai.
“Tu endang pemar ke ditapi bala pengajar ke maya hari tu,” ku iya rambau pengawa nutup ‘Program Jangkauan Komuniti, Institut Pematih Pengajar (IPG) Kampus Batu Lintang di Kampung Pichin ditu Hari Lima tu tadi.
Bisi 92 iku nembiak ke benung belatih nyadi pengajar nyereta program tiga hari nya.
Manyin ti mega nyadi Kaban Kunsil Nengeri (ADUN) Tebedu muji program ka baka nya laban meri peneleba ngagai bala sida ke belatih nyadi pengajar sentang pengidup peranak menua pesisir lalu iya ngarapka mayuh agi program ke sebaka diatur dudi hari.
Nengah juluk nempa Malaysia nyadi menua maju taun 2020, iya ngelalalu bala pengajar beratika enggau dalam gaya pengawa ke dikereja orang ba menua-menua ke udah maju iya nya ngemeratka produktiviti ngambika lebih ngasi sereta lanchar.
Dulu ari nya, Direktor IPG Batu Lintang Awang Hambali Awang Hamdan madah, program nya sebagi ari aktiviti khas beserimbai enggau pengawa nyambut ulang tahun IPG ke-66.
Iya madah, tu endang entara chara dikena meri peneleba ngagai bala sida ke deka nyadi pengajar bekaul enggau daya idup rayat mayuh ba sesebengkah kandang menua.
Sepemanjai program ke diatur ba Pichin, ku iya, bala sida ke nyereta program bepeluang belajarka perengka muzik Bidayuh ke dikumbai ‘pironcong’ enggau tawak kelimpah tanda ‘blanggi’.