SIBU: Sapit Menteri Pemansang Menua Pesisir enggau Kandang Menua, Datuk Alexander Nanta Linggi minta Universiti Kolej Teknologi Sarawak (UCTS) ngemeratka pemansang orang dagang di nengeri tu.
Nanta ke mega Kaban Parlimen Kapit madah, raban nembiak kemaya hari tu patut disikap ngena pengelandik bedagang sereta patut ngembuan pengingin ati ke chukup ransing nangkup pengawa nyadi orang dagang di menua pesisir tauka di kandang mengeri.
“Pemujur pengawa dagang kitai di menua tu empai datai ba tikas mujur sereta patut diseridi enggau lengkas awakka ulih nulung ngembing raban nembiak ditu bulih atur pengidup ke menyana pengudah sida tembu belajar ba universiti ila.
“Perintah deka nyukung raban nembiak kemaya hari tu ngemansangka dagang mit raban nya awakka ulih nyungkak pemanah pengidup sida.
“Udah nya ila, perintah deka ngemansangka pengawa dagang di menua pesisir awakka ulih sebaka mansang enggau pengawa dagang di kandang mengeri. Nya alai, aku minta perambu tu nyadi sebengkah juluk ati sereta nyadi pekara ke dulu dikemeratka universiti UCTS tu,” ku iya.
Nanta mansutka jaku nya lebuh ke ditanya raban pemberita ba sebengkah awak ke diatur raban media di UCTS ditu lemai ensana jauh.
Naib Chanselor UCTS Prof Dato Dr Abdul Hakim Juri mega bisi meri licha beserimbai enggau penemuai Sapit Menteri Pemansang Menua Pesisir enggau Kandang Menua nya ngagai UCTS lemai nya.
Nanta nampung jaku iya madah, Industri Mit enggau Jelan Pemesai (IKS), chukup beguna kena ngemansangka ekonomi di menua tu.
Kebuah pia, nitihka serenih enggau penemu iya, IKS tu ulih mengkang mujur dipejalaika enti dibanding enggau sekeda kompeni besai lebuh ke nyadi pekara ke enda disadang dalam industri dagang.
Sarawak deka bejalaika mayuh agi projek hidro elektrik kena mantu mayuh industri di menua tu bejalaika pengawa sida.
Iya chukup temegah ati sereta gaga meda pemanah infrastruktur enggau perengka pelajar ke bisi di UCTS.
Beserimbai enggau penemuai iya, Nanta madahka diri dipinta datai ngagai universiti nya dikena neleba sereta betukar penemu enggau raban UCTS bekaul enggau chara ngiga jalai pemansang ke manah.
“Sebengkah palan pelajar tinggi peribit, UniKL bisi nunjukka bantu enggau sukung ngagai UCTS kenyau ari pun suba. UniKL ke diau di baruh Majlis Amanah Rakyat (MARA) sereta sebengkah ari ejensi dibaruh Opis Pemansang Menua Pesisir enggau Kandang Menua lama udah bejalaika bantu sida ngagai UCTS,” ku iya.
Dulu ari nya, Dr Abdul Hakim nerangka pasal pun penatai UCTS.
Iya madahka UCTS tu diketuai Dato Sri Wong Soon Koh.
Ba penemuai nya, Hakim meri penerang ke silik ngagai Nanta bekaul enggau kuing UCTS nyengkaum misi, visi, teras strategik, nilai teras, program enggau strategi dikena narit mayuh agi nembiak masuk belajar ba universiti nya.